Тәбиғәтте яҡларға кәрәк

Бөгөнгө һүҙем беренсе йүнәлеш хаҡында. Беҙ «Тау буйҙары йәшәрһен, мәңге йәшел төҫ алһын» девизы менән тәбиғәтте һаҡлау, йылға-күлдәрҙе таҙартыу, шишмә юлдарын асыу, ағас ултыртыу, сүп-сар йыйыу кеүек эштәргә ихлас тотондоҡ. Күптән түгел башланғыс синыф уҡыусылары уҡытыусылары Ләйсән Өлфәт ҡыҙы Йәлилова етәкселегендә «Ҡоштар – беҙҙең ҡанатлы дуҫтар» акцияһын үткәрҙе. Балалар беҙҙең яҡтағы ҡоштар тураһында мәғлүмәт алды, һүрәттәр төшөрөп, бәйгелә ҡатнашты. Шулай уҡ атай-әсәйҙәр ярҙамы менән баҡсалағы ағастарға тағараҡтар эшләп эленде.
– Беҙҙең яҡтарҙа ҡыш бик һыуыҡ, әммә ҡоштарға бынан әллә ни зыян юҡ, сөнки уларҙың ҡандары ҡайнар. Ә бына ҡар аҫтынан аҙыҡ табыуы ҡыйын, шунлыҡтан бик күптәре аслыҡтан үлә. Әгәр ярҙам итмәһәк, уларҙың ҡайһы бер төрҙәре юҡҡа сығырға мөмкин, – тине Руфина Юламанова.
– Тағараҡтарыбыҙ бик үҙенсәлекле килеп сыҡты. Балалар менән көн һайын ем һибәбеҙ, ҡанатлы дуҫтарыбыҙға һоҡланып, уларҙы күҙәтәбеҙ. Ҡоштарға ярҙам итә алыуыбыҙ өсөн беҙ бик шатбыҙ, – тип ҡыуанысы менән бүлеште Ләйсән Өлфәт ҡыҙы.
Оҙаҡламай «Ҡоштар көнө» үткәрәбеҙ. Сыйырсыҡ оялары яһау буйынса конкурс иғлан ителәсәк.

Миләүшә ҒӘЙФУЛЛИНА,
башҡорт теле һәм әҙәбиәте уҡытыусыһы.
Ҡырмыҫҡалы районы, Малай мәктәбе.