Мал көтөргә лә оҫталыҡ кәрәк

Август айының һуңғы көндәрендә Ленар ҡустым менән Фәнис олатайыма мал көтөүен көтөштөк. Көн дә бик матур ине. Мал көтөү бик яуаплы эш икән. Ныҡ иғтибарлы булырға кәрәк. Мал таралып китеүе бар. Беҙгә көнө буйы тәбиғәттә йөрөү хәтәр оҡшаны. Бигерәк тә әсәйемдең килтергән төшкө ашы ныҡ тәмле булды. Ул Урал ҡустым менән килгәйне. Ҡырҙа сәй эсеүе күңел­ле икән шул! Олатайым әйтмеш­ләй, эшләп ашаһаң, ризыҡ тәмле була.
Мал ял иткән арала беҙ олатайымдың һөйләгән әкиәттәрен, әрмелә булған саҡтарындағы мажараларын рәхәтләнеп, йәшел үләндә ҡырын ятып тыңланыҡ. Шулай көндөң үткәне лә һиҙелмәне.
Иртәгеһенә өлгөргән картуфты йыйыштыҡ. Уңыш та нисауа уң­ған! Шаяра-ярыша тиҙ генә йый­ҙыҡ ул. Хатта өлкәндәр картуфты ҡаҙып өлгөрә алмай башланы. Күмәкләгән – яу ҡайтарған, тиҙәр бит. Шулай итеп, картуф үҫкән ерен ҡалған сүп-сарҙан да таҙартып, ҡышҡылыҡҡа әҙерләп ҡуй­ҙыҡ инде.
Ошо каникулымдағы матур, иҫтәлекле хәтирәләрем ҡышҡыһын күңелемде гел йылытып торор әле. Быйылға хуш бул, йәйем!

Данир ИХСАНОВ, III cиныф уҡыусыһы.
Туймазы районы, Өйәҙетамаҡ мәктәбе.