Райондың 95-се, 108-се мәктәптәре, «Дружный», «Эколог» үҙәктәре командалары, үҙҙәре менән таныштырып уҙғас, викторина һорауҙарына яуап бирҙе, проекттарын яҡланы.
– Беҙ Сәғит Агиш урамында урынлашҡан быуаны һаҡлау маҡсаты менән сығыш яһаныҡ. Уға ағып төшкән шишмәнән ҡасандыр һыу алып эскәндәр. Хәҙер эргәлә бейек-бейек йорттар төҙөлә, кескәй быуабыҙ һайыға, бысрана. Шунда килгән ҡыр өйрәктәренең төйәген ташлап китергә теләмәүе ҡыуаныслы, әлбиттә. Кешеләр һыу ятҡылығын бысратмаһын ине, – ти 108-се мәктәптең VI «Г» синыфы уҡыусылары Диана Әхмәтгәрәева, Әҙилә Юлдыбаева, Сафина Халиҡова, Дияр Фазлетдинов һәм Агагасан Ахундов. Гөлнара Сабир ҡыҙы Ниғмәтуллина етәкләгән тап ошо команда еңеү яуланы ла инде (һүрәттә).
Изге бурыстарығыҙҙы тормошҡа ашырырға яҙһын, тәбиғәт киләсәге – һеҙҙең ҡулдарҙа бит!
Лилиә МӘҮЛИТОВА.
Өфө ҡалаһы.