Шулай ҙа иң ҡыҙыҡлыһы синыф менән бергәләп экскурсияға сығыуҙыр ул. Көҙгө каникулда VIII «А» синыфы етәкселәре Рәшиҙә Рәфҡәт ҡыҙы Ишкилдина менән районыбыҙҙың Үрге Бикҡужа ауылында булып ҡайтты. Унда бағыр үрсетеү менән шөғөлләнгән Ләлә һәм Ғаяз Фәтҡуллиндарҙың шәхси фермаһын күргәндәр. Балаларға улар менән осрашыу ныҡ оҡшаған. Был ғаилә, ысынлап та, күптәргә өлгө булырлыҡ. Уңғандар, егәрлеләр, өлгөрҙәр. Фәтҡуллиндар кәзә, йылҡы малы үрсетә, ҡымыҙ етештерә, баҡсасылыҡҡа ла тотонған. Әйткәндәй, уларҙың пони, күркә, мысыр тауығы, тауис ҡошо ла бар.
Фәтҡуллиндар районыбыҙҙа агротуризм йүнәлешен дә яйға һалған. Йомағужа һыуһаҡлағысы ярты саҡырым алыҫлыҡта ғына, унда туристар күп килә. Хатта Мәскәүҙән дә, сит илдәрҙән дә. Яҡын булғас, өлкәндәр Фәтҡуллиндарҙың да хужалығын күреп, балыҡ ҡармаҡлап ял итһә, ә балалары йорт хайуандары, ҡоштары менән таныша. Беҙҙең мәктәп уҡыусылары шунда булып, күпте күреп, һоҡланып ҡайтты. Үҙҙәрен ҡыҙыҡһындырған төрлө һорауҙарына яуап та алдылар.
Һигеҙенселәр өсөн сәйәхәт файҙалы, иҫтәлекле булды. Улар менән:
– Тағы ла килегеҙ, – тип хушлашты Фәтҡуллиндар.
Гөлкәй АЛЛАБИРҘИНА, башҡорт теле һәм әҙәбиәте уҡытыусыһы.
Күгәрсен районы, Мораҡтағы 1-се мәктәп.