Тәбиғәт биргән байлыҡты файҙаланабыҙ икән, уны тулыландырып торорға кәрәк, шуға ла ата-бабаларыбыҙ: "Бер ағас ҡырҡһаң, икене ултырт",- тип васыят әйткән. Һәр кешегә кәмендә дүрт ағас ултыртыу фарыз, тигәндәр.
Хәйбулла районы Әбүбәкер ауылының "Сулпылар" балалар баҡсаһы тәрбиәләнеүселәре ата-әсәләр менән берлектә ошо изге ғәмәлде тормошҡа ашырҙы. Ағас ултыртыу өмәһе байрам кеүек үтте. Алдан билдәләнгән урынға ер ҡаҙып, ағас үҫентеләрен ултыртып, һыу һибеп ҡуйҙы улар. Йәш үҫентеләр тамыр алып нығынып китер һәм бер нисә йылдан тирә- яҡҡа йәм биреп ултырыр, тип ышанабыҙ. Әүҙем ҡатнашҡан ата-әсәләргә, үҫентеләр менән ярҙам итеүсегә:" Афарин!"- тиергә генә ҡала.
Фәимә НАЗАРОВА, "Сулпан" балалар баҡсаһы мөдире.
Хәйбулла районы, Әбүбәкер ауылы.