«Дарвин-лаб» – мауыҡтырғыс фәндәр үҙәге

Стәрлетамаҡ үҙәк балалар китапханаһы базаһында тәбиғәт һәм кеше тураһында «Дарвин-лаб» мауыҡтырғыс фәндәр үҙәге ойошторолған. Проект «Башҡортостан сода компанияһы» асыҡ акционерҙар йәмғиәте иғлан иткән «Стәрлетамаҡ – беҙҙең дөйөм йорт» ҡала конкурсы ярҙамында тормошҡа ашырылған, унда «Экология һәм хайуандарҙы яҡлау» номинацияһында грант яуланған.

Бында балалар һәм өлкәндәр өсөн экскурсиялар һәм лекциялар үткәреү өсөн экспонаттар ҡуйылған. Үҙәккә килеүселәрҙең барыһы ла тере күҙәнәктең нисек ҡоролоуын үҙ күҙҙәре менән күрә, тере организмдарҙың моделе һәм экосистеманың йәшәү закондары менән таныша ала. Балалар өсөн фәнни квестар, театрлаштырылған уйын программалары, календарь һәм тематик байрамдар ойошторола, унда балалар әҙәби персонаждар менән осраша. Балалар тикшеренеү оҫтаханаһы дәрестәрендә «Тере мөйөш»тә йәшәүселәрҙе: Африка кәрлә ҡарышлауығын, ташбаҡаны һәм ҡарлуғасты ҡарарға өйрәнә.

Был үҙәккә балалар йыш йөрөй. Яңыраҡ Стәрлетамаҡ ҡалаһының 1-се гимназияһында белем алыусы I синыф уҡыусыларына етәкселәре Таңһылыу Сәғит ҡыҙы Фәтхетдинова файҙалы экскурсия ойошторҙо. Балалар ваҡыттарын күңелле үткәрҙе.