Бөтә яңылыҡтар
Төнгө урам
17 Февраль 2021, 14:45

Балаларға ҡарата буллинг осраҡтары бар

Нимә һуң ул буллинг? Коллективта бер кешенең икенсе берәүҙе үсекләүе, кәмһетеүе, ҡыйырһытыуы, юрамал яла яғыуы, хатта ҡул күтәреүе.

Башҡортостанда һуңғы өс йылда балаларға ҡарата 28 буллинг осрағы теркәлгән. Был турала бөгөн Республика Хөкүмәте ҡарамағындағы балиғ булмағандар эштәре һәм уларҙың хоҡуҡтарын яҡлау буйынса комиссияның сираттағы ултырышында билдәле булды. Әммә рәсми һандар ғына был өлкәләге ысынбарлыҡты сағылдырмай, шуға ла, ғаилә, хеҙмәт һәм халыҡты социаль яҡлау министры Ленара Иванова белдереүенсә, үҫмерҙәргә ҡарата буллинг һәм кибербуллинг осраҡтарын булдырмау һәм асыҡлау өсөн бөтә мөмкинлектәрҙе файҙаланырға кәрәк.
"Мәғарифты үҫтереү институты үткәргән тикшереүҙәр һөҙөмтәһендә уҡыусыларҙың 40 проценты бер тапҡыр булһа ла буллинг йәки кибербуллингҡа дусар булыуы билдәләнгән", - ти мәғариф һәм фән министры Айбулат Хажин.
Һине кемдер ҡыйырһыта икән, үҙеңде нимәләлер ғәйепле тип һанарға ярамай, йомолоп та ҡалмаҫҡа кәрәк. Ярҙам һорап атай-әсәйеңә, уҡытыусыңа, мәктәп психологына мөрәжәғәт ит. Белем усағында бындай осраҡтарҙың сәбәбен асыҡларға, насар эҙемтәләргә килтереүенә юл ҡуймаҫҡа тейештәр.
Бөтә Рәсәй Берҙәм балалар ышаныс телефоны ла һеҙҙең ҡарамаҡта: 8-800-2000-122. Шылтыратыу бушлай, аноним һәм конфиденциаллек һаҡлана.
Читайте нас в