Кеше менән яҡшы мөнәсәбәт булдырыу серҙәре

1. Бер ваҡытта ла кешенән көлмәгеҙ. Тормош бит ул төрлө яҡлы. Йырҙарҙа йырланғанса, "бөгөн мин бәхетле, иртәгә – һин". Белеп булмай иртәгә кемдең көлөрөн, кемдең иларын.
2.  Кеше үҙе юҡта уны яманлап һөйләү – иң насар ғәҙәттәрҙең береһе. Әйтер һүҙең бар икән, тыныс ҡына итеп кешенең күҙенә ҡарап әйтергә кәрәк.
3.  Кеше һеҙҙең фекер менән килешмәҫкә лә мөмкин. Үҙегеҙҙе генә дөрөҫ тип һанарға ярамай. Фекере һеҙҙекенә тап килмәгән кешене дошман тип ҡабул итеү – аҡылһыҙлыҡ.
4.  Үҙеңсә эшләйем тиһәң дә, бер олоноң, бер кесенең һүҙенә ҡолаҡ һалырға кәрәк. Ситтән яҡшыраҡ күренә, тип бушҡа әйтелмәгән бит.
5.  Кеше менән һөйләшкәндә һинең үҙеңдең ысын йөҙөң асыла. Тәрбиәле кеше бер ҡасан да, ниндәй генә хәл булмаһын, кем менән генә әңгәмәләшмәһен, һәр ваҡыт матур һөйләшә.
6.  Кеше алдында байлығыңа маҡтанма. Иҫеңдә тот: байлыҡ – бер айлыҡ. Хоҙайҙан һаулыҡ һора.
7.  Үҙ хатаңды таныу – үҙе үк батырлыҡ. Кешене үпкәләткәнһең икән яман ҡылығың йә һүҙең менән, ғәфү үтенә бел. Был һинең үҙең өсөн кәрәк.
8.  Әгәр ҙә һүҙем үтһен, тиһәгеҙ, тыныс тауыш менән аңлатырға өйрәнегеҙ. Ҡысҡырған ҡарға ҡарлыҡҡан, тиҙәр.
9.  Көсһөҙ кеше үҙенең уңышһыҙлыҡтарын кешегә япһарыусан. Уға шулай еңелерәк. Ундай кешегә яуап бирмәү хәйерле.
10. Аҙ һөйлә, күп тыңла. Ауыҙыңды асыр алдынан уйлап ал ни әйтереңде, сөнки һәр әйтелгән һүҙ – беҙҙең үҙебеҙҙе ҡылыҡһырлай. Икенсенән, яғымлы һүҙҙәр һөйләгән ирендәр генә матур күренә.
11. "Әйттем бит", "шулай булырын белдем мин" тигән һүҙҙәрҙе үҙенән ҡәнәғәт булмаған кешеләр генә ҡуллана. Батыр булып күренгегеҙ килһә, һүҙ менән түгел, эш менән иҫбатлағыҙ.
12.  Кеше күрәләтә яңылыш фекер йөрөтһә лә, үҙе төшөнмәйенсә, абынмайынса дөрөҫлөктө күрмәйәсәк. Уға аҡыл өйрәтәм, тип ауырымаған башҡа тимер таяҡ алырға мөмкин.
13.  Талашты йә һүҙ көрәштереүҙе туҡтатыуҙың бер генә яҡшы ысулы бар: "Эйе, һин һәр ваҡыттағыса хаҡлы",- тип әйтеп. Был көсһөҙ, мыжыҡ, үжәттәргә бик кәрәкле һүҙҙәр. Шунһыҙ улар тынысланмаясаҡ.
14. Яҡын кешеләрегеҙҙе, коллегаларығыҙҙы тыуған көндәре, байрамдар менән ҡотларға онотмағыҙ.
15.  Башыңа килгән һәр уйҙы ҡысҡырып әйтергә кәрәкмәй. Кеше һинең уй-кисерештәрең, һинең хыялдарың, проблемаларың менән генә йәшәргә тейеш түгел. Эштә лә, ғаиләлә лә осрай ундайҙар.
16.  Һәр һүҙгә бәйләнмә. Тыныс бул. Һәр нәмәнән йөй эҙләп, бер туҡтауһыҙ һөйләнеп йөрөмә. Ялҡыта ундай әҙәмдәр.
17.  Йышыраҡ йылмайығыҙ. Ҡаштары төйөлөп, һөмһөрөһө ҡойолоп, бөтә нәмәгә зарланып йөрөүселәр менән кемдең аралашҡыһы килеп торһон? Хәҙерге барлыҡ заманында ҡәнәғәт була белеү ҙә – тәрбиәлелек.
18.  Кешене ғәфү итә белмәү үҙеңде Аллаһы Тәғәләнән юғары ҡуйып маташыуға тиң.
19.  Булған-бөткән мөнәсәбәттәрҙе әленән-әле тикшереп, үткәндәрҙе уйлап, уйҙарҙан уйылып китергә була. Был файҙаһыҙ икәнен аңларға кәрәк. Уйҙар йонсотмаһын тиһәгеҙ, китап уҡығыҙ, эш менән булығыҙ, спорт менән шөғөлләнегеҙ. "Мин бәхетһеҙ", - тип мыжып, бер туҡтауһыҙ мөнәсәбәт асыҡлап ятыуҙан алға китеш булмаясаҡ.
20. Яҡшы ҡатын – өй ҡото, ир яҡшыһы  – ил ҡото.
    
    

Сығанаҡ: vk.com

 Фото: vk.com