Ике ҡар бөртөгө

Йәнәш осҡан ике ҡар бөртөгө һөйләшеп киткән. Бер-береһен юғалтмаҫ өсөн улар ҡулға-ҡул тотошҡан.
– Осоп барыуы ниндәй рәхәт! – тигән береһе, күңелләнеп.
– Беҙ осмайбыҙ, ә аҫҡа тәгәрәйбеҙ, – тигән икенсеһе, моңһоуланып.
– Тиҙҙән ергә төшәсәкбеҙ һәм йомшаҡ юрған булып ятасаҡбыҙ.
– Юҡ, үҙебеҙҙең һәләкәтебеҙгә табан осабыҙ. Унда беҙҙе тапап үтәсәктәр.
– Беҙ йырғанаҡтарға әйләнеп, диңгеҙгә барып етәсәкбеҙ һәм мәңге йәшәйәсәкбеҙ! – тигән тәүгеһе.
– Юҡ, беҙ ирейбеҙ ҙә ғүмерлеккә юҡ буласаҡбыҙ, – тип ҡаршы төшкән икенсеһе.
Ахыр сиктә был бәхәс икеһен дә ялҡытҡан һәм улар ҡулдарын айырған. Һуңынан икеһе лә үҙҙәре һайлаған яҙмышҡа ҡарай осҡан.
Тормошта ла шулай бит: кемдер – оптимист, гел яҡшы нәмәләр тураһында ғына уйлай, үҙен матурлыҡҡа, изгелеккә көйләй. Икенселәр – пессимист, тормоштоң гел ҡараңғы яғын күрә, яҡшылыҡҡа ышанмай, күңелендә һәр ваҡыт икеләнеүҙәр, шикләнеүҙәр йөрөтә.
Улаpҙың ҡайһыһына тормошта йәшәүе еңелерәк, тип уйлайһығыҙ? Кеме­һенә бәхет нығыраҡ йылмая? Кемдең яҙмышы уңышлыраҡ була? Хатта ауырлыҡтар килгәндә лә йылмайып йәшәй белгәндәргә тормош барыбер мәрхәмәтлерәк булалыр ул.

А. САРМАТОВ.

РЕДАКЦИЯНАН: «Тәрбиә мәктә­бе»ндә баҫылған ғибрәтле, фәһемле ваҡиғалар хаҡында үҙегеҙ генә уҡып ҡалмайынса, өйҙә атай-әсәйҙәрегеҙ менән фекер алышһағыҙ, синыфта йәштәштәрегеҙ менән бәхәсләшһәгеҙ, үҙегеҙҙең тормоштан миҫалдар килтереп һөйләһәгеҙ, файҙалыраҡ булыр ине.