+12 °С
Ямғыр
Бөтә яңылыҡтар
Төрлөһөнән
12 Апрель 2018, 12:52
Атаһы – Үлмәҫбай, һеңлеһе – Аҡйондоҙ...
Ә уның исеме – Алтынай, фамилияһы – Вәлитов. Ишеткәнегеҙ барҙыр әле был егет тураһында. Бейеүсе, брейк-данс оҫтаһы. Иң беренсе мин дә, ҡыҙҙар исеме түгелме ул Алтынай, тип аптырағайным.
Ә уның исеме – Алтынай, фамилияһы – Вәлитов. Ишеткәнегеҙ барҙыр әле был егет тураһында. Бейеүсе, брейк-данс оҫтаһы. Иң беренсе мин дә, ҡыҙҙар исеме түгелме ул Алтынай, тип аптырағайным.
– Мин тыуғанда был исем яңы тарала ғына башлаған булған, әсәйемә бик оҡшаған да Алтынай тип ҡушҡандар. Танышҡанда күптәр ғәжәпләнә, өйрәнеп бөттөм инде хәҙер, – ти егет.
Атаһы ла һирәк осрай торған Үлмәҫбай исемен йөрөтә. Алтынай ҙа уға оҡшап, аҡһыл бөҙрә сәсле, зәңгәр күҙле. Бик үҙенсәлекле үтә уның бала сағы. Шаян, тиктормаҫ була. Аҡйегет ҡустыһы менән гел бергә уйнайҙар. Әйткәндәй, Аҡйондоҙ исемле һеңлеһе лә бар.
– Бейеклектән ҡурҡмай ҡыйыҡ башынан баҫтырыша, кәртә аша һикерә торғайныҡ. Бер ваҡыт ҡолап төшөп, аяҡты һындырҙым, – тип көлөп хәтерләй Алтынай. Шулай бәләкәйҙән экстремаллекте ярата ул. Ә сәнғәткә һөйөүе олатай-өләсәйенән, әсәһенән киләлер. Әсәһе Фәйләрә апай Өфө дәүләт сәнғәт институтын тамамлаған, баянда, ҡурайҙа, гитарала уйнай, йырлай ҙа. Алтынай ҙа шиғырҙар ижад итеп ҡарай, йырларға, бейергә ярата. Ә брейк-дансты ул үҙ аллы өйрәнә. Төрлө трюктарҙы видеоға ҡарап эшләй. Ҡустыһы Аҡйегет менән бергәләп даими шөғөлләнәләр. Атай-әсәйҙәре эштә саҡта көнө буйы өйҙә музыка яңғырай, йығылып тәндәрен һыҙырып, күгәртеп бөтәләр. Аҙаҡ шөғөлдәрен урамда дауам итәләр.
– Брейк-дансты атайым да, синыфташтар ҙа оҡшатмай. Юҡ менән булаһың, өлкәнәйергә ваҡыт, тиҙәр ине. Яйлап оҫтарып, төрлө трюктарҙы видеоға төшөрөп, интернетҡа һала башланыҡ. Ә «Дан минуты» район конкурсында Гран-при алыуыбыҙ тағы ла дәртләндереп ебәрҙе. Беҙгә белгән трюктарҙан бейеү һалырға тәҡдим иттеләр. Яйлап сәхнәлә сығыш яһай башланыҡ. Ә 2013 йылда Рәсәй телеканалында барған «Ҙур бейеүҙәр» телепроектының кастингында ҡатнашырға батырсылыҡ иттем һәм үттем. Проектта өс ай буйы шөғөлләнеү, танылған артистар менән эшләү тәжрибәне арттырҙы, үҫтерҙе, – тип һөйләй Алтынай.
Бынан һуң йәш бейеүсене Төркиәгә саҡыралар. Анталияла килешеү буйынса бер йылға яҡын эшләй. 2016 йылда Мысырҙа дүрт ай булып ҡайта, Сочиҙа ла сығыштар яһай ул. Әлеге ваҡытта Аҡйегет ҡустыһы менән бергә эстрада йырсыһы Гүзәл Уразова төркөмөндә Рәсәй ҡалалары буйлап гастролдә йөрөйҙәр.
Алтынайҙың атаһы – балта оҫтаһы. Уның, берәй һөнәр үҙләштер, тигән һүҙен йыҡмай Өфөләге сәнғәт училищеһында уҡыған. Стәрлетамаҡ мәҙәниәт техникумында белем алған. Ә әлеге көндә егеттең яратҡан һөнәре, икмәге – брейк-данс. Уның интернеттағы видеоклиптарын ҡарағанығыҙ бармы? Мәҫәлән, Ютубтағы «Ҡамыт», «Иле юҡтың – теле юҡ» тигәндәрен? «Замана байығы»н нисек брейк-данс стилендә бейегәнен? Алтынайҙың тамашасыһы күп. Иң мөһиме: был рухлы егеттең халыҡҡа әйтер һүҙе, донъяла барған хәл-ваҡиғаларға ҡарата үҙ фекере бар. Рэп стилендәге йырҙары аша еткерә ул уй-хистәрен.
– Алтынай, үҙеңдең студияңды ас! – ти уға дуҫтары. Йырҙар ижад итә, бейей, ысынлап та, үҙ студияһын асырлыҡ, үҙенең айырым концерттары менән сығыш яһарлыҡ егет бит. Нәҡ ошо турала хыяллана ла инде әлеге мәлдә бейеүсе.
Бер ниндәй ҡаршылыҡтарға ҡарамай, ныҡышмалы рәүештә алға табан барған, матур хыялдар менән бергә йәшәгән Алтынайҙың сәхнәне, эстраданы яуларына ышанабыҙ һәм уңыштар теләйбеҙ.
Эльвира ӘСӘҘУЛЛИНА.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж