Бөтә яңылыҡтар
Төрлөһөнән
21 Сентябрь 2018, 13:13

Беҙҙә лә ирекмәндәр бар

Рәсәйҙә Ирекмәндәр йылы айҡанлы 47-се моделле балалар китапханаһында Саша Ғәзина етәкселегендә «Клевер» исемле отряд ойошторолдо. Ирекмәндәр иҫке ҡағыҙ йыйыу буйынса экологик акциялар үткәрҙе, ҡыш­ҡыһын ҡоштарға тағараҡтар яһаны, иҫке батарейкалар йыйыуҙа ҡатнашты. Китапхананың эргә-тирәһе матур булыуында ла отряд ағзаларының өлөшө ҙур. Шаҡша биҫтәһенең иҫтәлекле обелискыһы янындағы сүп-сарҙы йыйыуҙа ла әүҙем ҡатнаштылар, экология темаһына плакаттар эшләп, халыҡҡа тараттылар.

Китапхананың уҡыу залында ойошторолған «Аҡыллы китаптар уҡыйбыҙ һәм тәбиғәтте һаҡлайбыҙ» тип аталған күргәҙмә лә барыһына оҡшағандыр. Уны биҙәр өсөн ирекмәндәр ҡағыҙ­ҙан сәскәләр, күбәләктәр, бал ҡорттары, ҡоштар һәм ҡурсаҡтар яһаны. Күргәҙмә эргәһендә интерактив күҙәтеүҙәр, викториналар, экологик квестар уҙғарылды. Китапханасылар китап уҡыусыларға Өфөләге ирекмәндәр тураһында һөйләне.

Любовь ОСНАЧ,
китапхана мөдире.
Өфө ҡалаһы.