Ә уның менән инде уйынсы идара итә. Төп маҡсаты – ғаиләне һаҡсылыҡҡа, хужалыҡты төплө алып барырға һәм булғандың артығын исраф итмәҫкә өйрәтеү. Бының өсөн нимә кәрәк? Беренсенән, иҫке ҡоролмаларҙы энергия һаҡлаусы яңыларына алмаштырырға. Икенсенән, коммуналь сығанаҡтарҙы үлсәп кенә тотонорға һәм түләүҙәрҙе кәметергә. Өсөнсөнән, күп фатирлы йорт менән идара итергә өйрәнергә. Шул ваҡытта һаҡлап ҡалған уйын аҡсаларына яңы көнкүреш техникаһы, ҡоролмалар йәки яҡындарыңа бүләк алып була. Уйында ла, тормоштағы кеүек, өйөңдә уңайлы һәм ҡотло булыуға уңыш, кәйеф һәм ғаилә бәхете бәйләнгән. Бөгөн уның «Фатир», «Өй», «Квартал», «Таҙа ҡала» кимәлдәре булдырылған.
Был сайтта уҙғарылған чемпионатта Рәсәйҙең төрлө ҡалаларынан уҡыусылар ҡатнаша. Ошо компьютер уйыны сиктәрендә сентябрь башында «Өфө – таҙа ҡала» киберспорт турниры ла уҙғарылды. Унда баш ҡала мәктәптәренән VII – XI синыфтар уйнаны. Ике көнлөк ярышта барлығы 52 мең 734 уҡыусы көсөн һынаны. Турнир үткән саҡта беҙгә торлаҡ-коммуналь хужалығын реформалауға булышлыҡ итеүсе фонд вәкилдәре лә килгәйне.
Уйында еңеүселәр тип VII – VIII синыфтар араһынан 84-се татар гимназияһы уҡыусыһы Камил Мәхмүтгәрәев танылды, IX – XI синыфтар араһынан иң-иңе – 123-лицейҙан Саша Гришин. Улар һәм II, III урынды яулаусылар дипломдар менән бүләкләнде. Ә иң төп приз Камилға эләкте. Уға «Артек» халыҡ-ара балалар үҙәгенә юлламаға сертификат тапшырылды.
– Бик яҡшы егет. Бөтә сараларҙа әүҙем ҡатнаша. «Артек»та ял итеп ҡайтҡас, ҡала хакимиәтендә йыйылышта сығыш та яһаясаҡ. Беҙ уның менән ғорурланабыҙ, – тип маҡтай үҙен гимназия директоры Рауил Рифҡәт улы Иҙрисов.
Әйткәндәй, был гимназия уҡыусылары һәр яҡлап күптәргә өлгө булырлыҡ. Әленән-әле Сипайлово биҫтәһендә йылға буйҙарын таҙартыу эштәрендә, өмәләрҙә әүҙем ҡатнашалар. Афариндар!