-30 °С
Болотло
TelegramТестарVKOK
Арзан хаҡҡа яҙылып ҡалайыҡ!
Бөтә яңылыҡтар
Төрлөһөнән
28 Сентябрь 2018, 15:36

Бүләк алып ҡыуандылар

Район балалар китапханаһында «Йәй һәм китап» конкурсына йом­ғаҡ яһалып, бик матур байрам үтте. Унда бөтә ауылдарҙан да бәйге­лә әүҙем ҡатнаш­ҡан балалар йыйылды. Китапханасы Ләй­лә Ишкинина ҡунаҡтар­ҙы сәләмләп, һәр береһе менән таныштырып үткәс, күңелле квест башланды. Балалар уйында бик дәртләнеп ҡатнашты, ҡатмарлы этаптарҙы сәмләнеп уҙҙы. Уҡыған әҙәби әҫәр­ҙәр­ҙе, яратҡан геройҙарын иҫкә төшөрҙөләр.

Бәйге шарттарына ярашлы, ҡыҙҙар һәм малайҙар йәй дауамында 20-нән ашыу китап уҡырға һәм номинациялар буйынса ижади эш башҡарырға тейеш ине. «Иҫке әкиәт­те – яңыса» тигәнендә Рәсәй халыҡтары әкиәттәренә ҡарата фанфик яҙыр­ға, «Әкиәт­тәр – серле донъя» исемлеһендә яратҡан халыҡ әкиәте сюжеты буйынса һүрәт төшөрөргә, «Китаптың мәңгелек юлдашы» бәйгеһендә үҙ ҡулдарың менән китап ҡыҫтырғысы эшләргә тәҡдим ителде. Ижади эштәрҙән ойошторолған күргәҙмә лә матур ине.

Иң күңелле мәл – бүләкләү өлөшөн һәр кем тулҡынланып көтөп алды. Тәүҙә «Йәйге уҡыу лидеры» исеменә лайыҡ булған Исламбай вәкиле Динар Халиҡовты тәбрикләнеләр. Артабан номинацияларҙа еңеүселәр бүләкләнде. Иҫке әкиәтте яңыса яҙыусылар араһында беренсе урын – Иҫке Мөсәттән Йәмилә Биктановаға, икенсе урын Байназарҙан Вәсилә Әйүповаға бирелде. Өсөнсөгә Мораҙымдан Мәүлиҙә Әминева менән Ҡотандан Нурсиә Нәҙершина сыҡты. «Әкиәттәр – серле донъя» номинацияһында беренселекте Аҫҡарҙан Гөлсимә Мырҙабулатова алды. Ғәлиәкбәр­ҙән Таңсулпан Исламбаева менән Ҡолғананан Гөлмирә Вәлиева – II, Әтектән Гөлшат Сәлихова менән Ғәҙелгәрәйҙән Шәүрә Сәғитова өсөнсө урын яуланы. «Китаптың мәңгелек юлдашы» номинацияһында беренсе урынды – Килдеғолдан Розалиә Көмөшбаева, икенсе урынды Иҫке Монасиптан Яҙгөл Йомағолова алды. Нәбиҙән Розана Сафинаға дәртләндереү призы тапшырылды.

Айгөл ҒӘБИҘУЛЛИНА.

Бөрйән районы.
Читайте нас в