Бөтә яңылыҡтар
Төрлөһөнән
19 Апрель 2019, 19:47

Бөгөнгө мода: башҡортса һөйләшеү, «Йәншишмә»гә яҙылыу!

Радий ХӘБИРОВ, республика Башлығы вазифаһын ваҡытлыса башҡарыусы: – Бөгөн минең башҡорт телем өсөн «икеле» ҡуймағыҙ. Бер нисә фекерем бар ине. Һеҙҙең менән уртаҡлашырға уйлайым.

Иң башта шуны әйтәйем. Һеҙ беләһегеҙҙер, миңә биш йәш тул­ғанға тиклем Ишембай районының Һайран ауылында торҙоҡ. Биш йәштә атайым, әсәйем ҡалаға күсте, шунда мин дә инде күстем. Артабан мәктәпкә төштөм һәм унда тик урыҫса ғына һөйләштек. Шуға яйлап-яйлап башҡорт телемде юғалта башланым.

Хәҙер, һеҙ беләһегеҙ, миңә илле биш йәш. Мәскәүҙә 10 йыл йәшәнем, унда ла тик урыҫса ғына аралаштыҡ.

Нимә әйтергә уйлайым: минең кеүектәр меңәрләгән. Беҙ тыуған илгә, туған телгә ҡайттыҡ, әлегә таҙа итеп башҡорт телендә һөйләшә алмайбыҙ.

Бөгөн һеҙҙең менән бергә бер нисә һорауға яуап табырға кә­рәк.

Беренсе һорау – беҙгә нисек ололарҙы, балаларҙы башҡорт теленә өйрәтергә? Һөҙөмтәле итеп өйрәтергә?

Икенсе һорау – беҙҙең баш­ҡорт телен өйрәтеүҙе нисек яңы ябай методикалы итергә?

Өсөнсө һорау – нисек башҡорт телен өйрәтеүҙе, башҡорт телендә һөйләшеүҙе модалы, заманса итергә?

Тағы ла бер фекер бар, кеше башҡортса бер генә һүҙ белһә, беҙ уны үҙ итәйек, ситләтмә­йек. Шуны ла әйтергә уйлайым. Һеҙ ҡурҡмағыҙ, беҙ бергә! Был ҙур эште бергә атҡарырға тейешбеҙ!