Бөтә яңылыҡтар
Төрлөһөнән
11 Май 2019, 06:06

Сәләмәт кешенең уйы ла таҙа

Әлеге көндә сәләмәт тормош алып барыу модаға инеп барыуы мине бик шатландыра. Беҙҙең ауыл йәштәре лә спортты ныҡ ярата. Кис етә башлау менән кемдер – йәйәү, берәүҙәр скандинав таяҡтары тотоп, икенселәр йүгерергә, велосипедта йөрөргә урамға сыға.

Был ваҡытта тышта бик күңелле булып китә. Ауылыбыҙ менән сәләмәт тормош яҡлы икәнебеҙ күренеп тора. Тимәк, минең ауылдаштарым спорттың ниндәй фай­ҙалы икәнен яҡшы аңлай. Ул бит һине сыныҡтырып ҡына ҡалмай, рухыңды ла нығыта, яҡшы тормошҡа әйҙәй.
Яратҡан мәктәбемдә беҙ уҡып ҡына ултырмайбыҙ, сәләмәтлегебеҙ хаҡында ла онотмайбыҙ. Йылына бер нисә тапҡыр төрлө спорт ярыштары ойошторола. Бына әле яңыраҡ спорт аҙналығы шул тиклем күңелле, фай­ҙалы үтте. Һәр кем төрлө ярыштарҙа үҙен һынаны. I – V синыфтар атай-әсәйҙәре менән бергә ҡатнашты, VI – VII синыфтар баскетбол, пионербол уйнаны. Тәбиғәт хаҡында ла оноторға ярамай, VIII – X синыфтар был көндө өмәгә сыҡты. Аҙналыҡ сиктәрендә сәләмәтлек хаҡында синыф сәғәттәре үткәрелде, төрлө темаларға һүрәттәр конкурсы ойошторолдо, таҙалыҡ хаҡында дауахана табибы Ләйсән Хөснөтдин ҡыҙы Низамова бик фәһемле лекция уҡыны. Белем усағының иң яҡшы уҡыусылары Магнитогорск ҡалаһына «Мөғжизәләр шарлауығы»на һыу инергә, университетҡа экскурсияға барҙы. Был ғүмергә иҫтә ҡалырлыҡ минуттарҙы беҙҙең алдынғы уҡыусыларға мәктәп директоры Йомадил Вәкил улы Әүбәкиров бүләк итте.
Сәләмәтлеккә арналған аҙналыҡтың үткәне һиҙелмәй ҙә ҡалды. Шулай әҙерәк йүгереп, һикереп алғандан һуң, беҙ тағы ла дәртләнеберәк уҡырға тотондоҡ. Бушҡа ғына олатайҙарыбыҙ: «Сәләмәт тәндә – сәләмәт рух», – тимәгән бит. Тә­не сәләмәт кешенең уйы ла таҙа була!

Гөлфинә БҮЛӘКБАЕВА, V синыф уҡыусыһы.
Әбйәлил районы, Амангилде мәктәбе.