Бөтә яңылыҡтар
Төрлөһөнән
16 Май 2019, 14:46

Өфөлә балалар өсөн дә ҡунаҡхана бар

Өфөлә «Үҫмер» социаль ҡунаҡханаһы барлыҡҡа килеүгә бер-ике генә йыл әле. Уның янында «Ғаилә усағы» балалар һәм ата-әсәләр клубы ла эшләй.

Был учреждение 11 – 18 йәшлек бала һәм үҫмергә иҫәпләнгән. Ғаиләлә ҡатмарлы хәлдәр килеп сыҡҡанда, тиҫтерҙәре менән уртаҡ тел таба алмаған, мәктәпкә барырға теләмәгән, уҡыуға әҙ иғтибар биргән үҫмерҙәрҙе атай-әсәйҙәре социаль ҡунаҡханаға 6 айға урынлаштыра ала. Был ваҡыт эсендә улар мәктәптә уҡыуҙарын дауам итә, спорт менән шөғөлләнә, мәҙәни сараларға йөрөй. Әлбиттә, медицина хеҙмәте, социаль-педагогик һәм социаль-психологик ярҙам да күрһәтелә. Бала социаль ҡунаҡхананан ғаиләһенә үҫмерлек осорондағы проблемаларҙы еңеп, нығынып ҡайтырға тейеш.
«Үҫмер» социаль ҡунаҡханаһы һәм «Ғаилә усағы» проектын Рәсәй Федерацияһы Президенты ҡарамағындағы Бала хоҡуҡтары буйынса вәкил Анна Кузнецова ла юғары баһаланы һәм был тәжрибәне илдең бүтән төбәктәрендә лә ҡулланырға кәрәк, тип белдерҙе.