-8 °С
Болотло
TelegramТестарVKOK
Бөтә яңылыҡтар
Төрлөһөнән
30 Август 2019, 14:48

Бөгөнгөләй хәтеремдә Тәү мәктәпкә барыуым

Ислам ТӨХВӘТУЛЛИН, республика Йәштәр Хөкүмәте рәйесе: – Беҙ ғаиләлә өс бала үҫтек: Динә исемле һеңлем һәм оло ағайым Артур. Һәр саҡ кеселәр өлкәндәр артынан бөтә нәмәне лә ҡабатлай бит инде. Мин дә тиҙерәк ағайым кеүек мәктәпкә бар­ғым килде.

Шуға күрә лә әсәйемдән сумка һа­тып алдырып, уҡый белмәһәм дә, өҫтәл алдына ултырып, үҙемсә уйнай торғайным. Белем усағы ниндәйҙер бик ҡыҙыҡ­лы һәм сәйер урын кеүек тойола ине. Әйткәндәй, минең өләсәйем дә башланғыс синыфтар уҡытыусыһы булып, 40 йыл ғү­мерен балаларға ба­ғышлаған. Бәләкәй саҡтан әсәйем менән өлә­сәйем беҙгә халҡыбыҙ­ҙың төрлө әкиәттәрен һөйләп үҫтер­ҙе. Урал батырҙай рухлы, Салауаттай көслө, Зәки Вәлидиҙәй уҡымышлы булырға өндәнеләр.

Минең уҡырға теләгем ҙур булғас, алты йәшемдә үк Ишембай районы Сәлих ауылы мәктәбенә бирҙеләр. Беренсе синыфҡа уҡырға килгәс, тәүге уҡытыусым Нәйлә Муса ҡыҙы яратҡан кешемә әйләнде. Ысынлап та, ҙур йөрәкле, итәғәтле педагог ул. Синыфташтарымдың күбеһе менән дә таныш инек инде.

Етенсе синыфҡа Ишембай ҡалаһындағы Башҡорт кадет корпусына уҡырға индем. Был белем усағы мине заманса фекер йөрөтөргә, киң белемле булып, һәр саҡ ысын ир-егет булып ҡалырға өйрәтте. Бигерәк тә башҡорт теле уҡытыусым Фаягөл Тимербай ҡыҙы Әмирхановаға рәхмәтлемен. Ул халҡыбыҙҙың бөйөк «Урал батыр» эпосын ятлап ҡарарға тәҡдим ит­те һәм дүрт йыл буйы район һәм республика кимәлендә үткәрелгән кон­курстарҙа еңеп барып, 2013 йылда Гран-при яуланым. Рухымды, дәртемде уятып ебәреүсе шәхес ул Фаягөл Тимербай ҡы­ҙы. Әле лә һөйләшеп торабыҙ, еңеү­ҙәрем менән уртаҡлашып, уға һәр саҡ хәбәр итеп торам.

Артабан уҡыуымды Мифтахетдин Аҡмулла исемендәге Башҡорт дәүләт педагогия университетында дауам иттем. Унда ла деканыбыҙ Луиза Хәмзә ҡыҙы Сәмситова беҙҙе ысын шәхес итеп тәрбиәләргә тырышты. Республика, Рәсәй, халыҡ-ара кимәлдә үткәрелгән төрлө форумдарға, конференцияларға ебәреп торҙо. Һәр кемгә лә ярҙам ҡулы һуҙырға әҙер ул, студенттарҙы һәр саҡ рухлы, дәртле, иманлы, киң, заманса фекер йөрөтөүсән, белемле, аҡыллы булырға өндәне.

Шулай уҡ ғилми етәксем, Дәүләт Йыйылышы – Ҡоролтай депутаты, Башҡортостан Яҙыусылар союзы рәйесе Зәки Арыҫлан улы Әлибаевҡа булған рәхмәттәремдең сиге юҡтыр. Диплом эшемде «бишле»гә яҡлап, университетты ҡыҙыл дипломға бөтөүемә бик шатмын, бәхетлемен. Ғөмүмән, тормош юлымда осраған барлыҡ уҡытыу­сыларыма баш эйеп, рәхмәт әйтәм!
Читайте нас в