+12 °С
Ямғыр
Бөтә яңылыҡтар
Төрлөһөнән
28 Декабрь 2019, 01:10
Мөғжизәле Шыршы байрамында
Ә һеҙ, балалар, мөғжизәгә ышанаһығыҙмы? Ышанмаған ҡайҙа, уға инанһаң ғына уйлаған изге теләктәрең ҡабул була, тиһегеҙме? Ысынлап шулай ул, уҡыуҙа алдынғы, төрлө конкурс, олимпиадаларҙа, спорт ярыштарында еңеү яулағандар ҙа, һаулығы буйынса мөмкинлеге сикләнгән балалар ҙа республика Башлығы Шыршыһы байрамын күрергә бик теләй ине.
Байрам тантанаһы «Башҡортостан» дәүләт концерт залында үтте. Мауыҡтырғыс әкиәтте ҡарар алдынан ҡыҙҙар, малайҙар фойела ойошторолған битлектәр, аппликациялар эшләү буйынса оҫталыҡ дәрестәре алды. «Берҙәм Рәсәй» партияһының төбәк бүлексәһе ярҙамында «Башҡортостан» дәүләт концерт залы ойошторған «Яңы йыл дуҫлыҡ сылбыры» акцияһына ҡушылып, Башҡортостан Республикаһы Хөкүмәте Премьер-министры урынбаҫары Фәнүр Йәғәфәров, республика Башлығының хәләл ефете Каринэ Хәбирова, мәҙәниәт министры Әминә Шафиҡова, Рәсәй Федерацияһының Дәүләт Думаһы депутаты Рима Баталова менән бергә дуҫлыҡ сылбырына «изгелек», «тыныслыҡ», «дуҫлыҡ» кеүек яҙыуҙарҙы йәбештереп ҡуйҙылар.
Ә инде шыршы тирәләй Ҡыш бабай, Ҡарһылыу һәм башҡа әкиәт геройҙары ҡатнашлығында уйындар уйнау, йырҙар йырлау, клоундарҙың ҡомаҡтар ҡатнашлығында тамашаларын ҡарау ҙа һәр береһенең кәйефен тағы күтәреп ебәрҙе.
– Иң һәләтле, иң тырыш 12 уҡыусы алып килдек. Баймаҡ интернат-лицейынан Гөлфиә Мөхәмәтшина – уҡыу алдынғыһы, 4-се лицейҙан Йәнгүзәл Зәйнуллина Баймаҡ телевидениеһында үҙен танытып, төрлө сараларҙа йыш ҡатнаша. Ниғәмәт мәктәбенән Рәмилә Ишмәтова «Урал батыр» эпосын яттан һөйләүселәр бәйгеһендә беренсе урын алды. Ә 2-се мәктәптән Алина Әлекбаева «Республикама дан йырлайым» республика иншалар конкурсында еңеү яуланы. Төп Шыршы байрамына эләгеүҙәренә балалар бик шатланды. Беҙҙе бында матур итеп ҡаршы алдылар, барыһы өсөн дә рәхмәт, – ти Баймаҡ районынан уҡыусыларҙы алып килеүсе етәксе, ҡалалағы интернат-лицейҙа директорҙың тәрбиәүи эштәр буйынса урынбаҫары Рәсимә Моратова.
Байрамда ҡатнашҡан Альвина Рәжәпова – Көйөргәҙе районы Абдул мәктәбенән.
– Бик шатмын. Яҡшы уҡығаным һәм конкурстарҙа призлы урындар алғаным өсөн республика Шыршыһын күрергә яҙҙы. Шиғыр һөйләүселәр бәйгеһендә ҡатнашам, фәнни-ғәмәли конференцияларҙа, олимпиадаларҙа гел призлы урындар яулайым. Алдағы йылда ла тырышып уҡырға, яңы белем үрҙәренә үрләргә теләйем, – ти ул.
Шундай шәп ҡыҙҙар һәм малайҙарҙы республика Башлығы Радий Хәбиров исеменән Хөкүмәт Премьер-министры урынбаҫары Фәнүр Йәғәфәров ҡотлап, иң матур теләктәрен еткерҙе.
– Ҡәҙерле дуҫтар! Һеҙҙе яҡынлашып килгән Яңы 2020 йыл менән ихлас ҡотлайым. Башҡортостан уңыштарығыҙға шатлана, еңеүҙәрегеҙгә һоҡлана. Киләсәктә лә өлгө булып, яңынан-яңы үрҙәргә ынтылып, уңыштарға ирешеп йәшәргә яҙһын, – тине ул сығышында.
Унан күмәкләп «Ҡыш бабайҙың тылсымлы циркы» тигән байрам әкиәтен ҡарау онотолмаҫ тәьҫораттар ҡалдырғандыр, тип ышанғы килә. Яңы йыл тамашаһы сысҡандар ғаиләһе – Мышлаевскийҙар тураһында ине. Макс исемле сысҡан малайы цирк артисы булырға хыяллана. Тик, буйы бәләкәй булыу сәбәпле, сығыш яһарға алмаҫтар, тип ҡурҡа. Бәләкәй сысҡандың уй-теләген бойомға ашырырға Ҡыш бабай ярҙамға килә. Буйы ҙурайып, Макс циркта үҙен күрһәтә башлай. Уның сығышын бик йылы ҡабул итәләр. Байрам спектакле күңелле йырҙар, бейеүҙәр менән аралаштырып алып барылды.
Республика Шыршыһы һуңында һәр бала Яңы йыл бүләктәре алып һөйөнөп, яҡшы кәйеф менән ҡайтыу яғына юлланды. Ҡыҙҙар һәм малайҙарҙың хыялын тормошҡа ашырған мөғжизәле байрам хәтерҙәрендә оҙаҡ һаҡланыр әле.
Өфө ҡалаһы.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж