Мәктәпкә лә – милли кейемдә

Яҙ көнө коронавирус пандемияһы айҡанлы карантин иғлан ителгәс, бөтә саралар ҙа онлайн форматта үткәйне, ә был юлы офлайндары ла булды. Беҙҙең республикала 160 милләт вәкиле йәшәй. «Торатау» конгресс-холы янындағы амфитеатрҙа «Евразия йөрәге» халыҡ-ара фестивале башланыр алдынан ойошторолған «Беҙ бергә» тигән флешмобта башҡорт, урыҫ, татар, мари, сыуаш, белорус, удмурт, мордва һәм баш­ҡа милләт вәкилдәре­нең сағыу кейемдәрен, бейеүҙәрен күрергә мөмкин булды.

Өфөлә шулай уҡ «Милли кейем халыҡ мәҙәниәте­нең үҙенсәлеген сағыл­дыра» тигән «түңәрәк өҫтәл» ойошторолдо. Сарала баш­ҡорт милли кейемен тегеүсе оҫталарҙың «Там­ға» халыҡ-ара конкурсы үткәреләсәге тураһында иғлан ителде. Унда «Балалар милли кейеме»тигән номинация ла бар. Бәйгегә йомғаҡ Баш­ҡорт теле көнөндә яһаласаҡ.

Байрам сараларынан балалар ҙа ситтә ҡалманы, әлбиттә. Өлкәндәр – эшкә, уҡыусылар уҡырға милли кейемдәрен кейеп барҙы. Белорет ҡалаһындағы Яныбай Хамматов исемендәге башҡорт гимназия­һының башҡорт теле уҡы­тыу­сыһы Сәриә Ҡаһар­манова хәбәр итеүенсә, VI – VIII синыфтар тулыһынса тип әйтерлек милли кейемдә булған. Ә башҡалар түшелдерек, бишмәт, түбәтәй булһа ла кейгән, биҙәүестәр таҡҡан. Унынсынан, бишенсенән ике ҡыҙ әсәйҙәре менән бергәләп теккән күлдәктә килгән. «Тәүге дәрестә психолог өлкән синыфтарҙа милли кейемдең, йәғни оҙон күлдәк кейеүҙең ҡыҙҙар сәләмәтлегенә, психологик торошона ыңғай тәьҫир итеүен аңлатып үтте. Һигеҙенсенән Регина менән Азалиә көн дауамында һәр кабинетҡа инеп, Милли кейем байрамы тура­һында мәғлүмәт бир­ҙе. Бынан тыш, баш­ҡорт теле һәм әҙәбиәте дәресендә уҡыу­сылар һәр яҡтың үҙенә генә хас кейемдәре булыуы, улар­ҙың орнаменттары, на­ғыш-биҙәктәре менән бер-береһенән айырылып тороуы хаҡында байтаҡ яңылыҡ алды. Дәрестәр бөткәс тә күптәр кейемдәрен һалғылары килмәй, үҙҙәре өсөн фото сессия ойошторҙо», – ти Сәриә Ҡа­һарманова.

Өфөләге 308-се башҡорт балалар баҡсаһы тәрбиәләнеүселәре өсөн дә был көндө йөкмәткеле сара­лар ойошторолдо. Мәҫәлән, 9-сы мәктәпкә уҡырға барасаҡ әҙерлек төркөмөнә йөрөүселәр янына баш­ҡорт һылыуҡайы ҡунаҡҡа килеп, кескәйҙәрҙе серле һандығындағы милли кейемдәр менән таныштыр­ҙы. Ҡашмау, күлдәк, камзул, бүрек, ситек... Балалар уларҙың һәр береһе тураһында күпте белеп ҡалды. «Йәшерәм яулығымды», «Түбәтәй» («Таҡыя») хәрәкәтле уйындарын да бик оҡшаттылыр.

«Ҡояшҡай» төркөмө иһә музейға барып, тирмә, уның эсендәге йыһаздарҙы ҡараны. Боронғо башҡорттарҙың көнкүреше менән таныштылар.

Милли кейем көнөндә олоһо ла, кесеһе лә ихлас ҡатнашты.