1984 йылда мәктәпте тамамланғандан һуң әрме сафына алына. Анапала алты ай хәрби әҙерлек үтә. Шунан инде 1985 йылдың апрелендә Краснодарҙан самолёт менән Термезға осалар. Унда үҙҙәрен һуғышҡа әҙерләй башлайҙар. Артабан етешәр кешенән торған төркөмдәргә бүлеп, катерҙарҙа ил сиге һаҡсыһы итеп ҡуялар. Атайым гранатомётсы була. Пяндж йылғаһы буйлап Төркмәнстан, Тажикстан, Үзбәкстан республикаларының сиген һаҡлайҙар.
Ул барлығы 16 хәрби операцияла ҡатнашҡан. Яраланып, ике ай госпиталдә ятып сыҡҡан. Аҙаҡ инде түшенә миҙалдар тағып тыуған еренә ҡайтып төшә.
Атайымдың әрме хеҙмәтендә күргәндәрен, кисергәндәрен һөйләүен беҙ һәр саҡ ихлас күңел менән тыңлайбыҙ. Уның Афғанстандан яҙған һалдат хаттары бөгөн дә шул һуғыш йылдарын хәтерләтеп, беҙҙең өйҙә иң ҡәҙерле яҙма булып һаҡлана. Атайым уларҙы йыш ҡына ҡулына алып, күңел йомғаҡтарын һүтә. Ә беҙ, балалары, шундай көслө, батыр атайыбыҙ менән ғорурланабыҙ.
Вәсилә ӘЙҮПОВА,
йәш хәбәрсе.
Бөрйән районы,
Байназар мәктәбе.