Юлбарыҫ йылын ҡаршылағанда ниндәй төҫтәргә өҫтөнлөк бирергә һуң? Йыл хужаһына оҡшайым тип, уның туны кеүек күлдәк кейеп ҡуймағыҙ, сөнки хайуандар батшаһына сыбар төҫтәге әйберҙәр оҡшамай икән. 2022 йылдың стихияһы һыу булғас, зәңгәрһыу, йәшел төҫтәр яҡшы булыр. Һорғолт, ҡараларын да һайларға мөмкин. Иң мөһиме, күлдәгегеҙ бер төҫлө булһын. Биҙәүестәрҙе күп тағыуҙы юлбарыҫ өнәмәйәсәк. Кейем тәбиғи туҡыманан булһа, шул һәйбәтерәк.
Өй эсен биҙәгәндә лә тәбиғилеккә иғтибар итегеҙ. Өҫтәл япмалары, салфеткалар биҙәкле булмаһа ла ярай. Ә бына леопард, зебраны хәтерләткән түшәк-юрғандарығыҙҙы төпкәрәк йәшереп тороғоҙ: был юлбарыҫҡа оҡшамаясаҡ.
Өҫтәлгә, әлбиттә, мул итеп ит ризыҡтарын ҡуйырға кәңәш ителә. Юлбарыҫ бит ит ярата. Балыҡты иһә йыл хужаһы баһаламаясаҡ. Салаттарҙа ла иттең күп булыуы хуплана.
Юлбарыҫ йылы тураһында һынамыштарға ҡарағанда, халҡыбыҙ был йылға өмөт менән ҡараған: Барыҫ йылы бары үҫер; Барыҫ йылы – байлыҡ йылы; Барыҫ йылы барын сәс. Алдағы йыл уңыштар ғына килтерһен!