Ирекмәндәр, тимурсылар — изгелек ҡылыусылар

Шул уҡ ваҡытта Шайморатов генерал, Александр Доставалов, Салауат Юлаев исемендәге батальондарҙа туп­ланған яҡташтарыбыҙҙы кәрәк-яраҡ, эске йылы кейемдәр, ойоҡбаштар, бейәләйҙәр, башлыҡтар, тиҙ боҙолмай торған аҙыҡ-түлек һәм башҡа нәмәләр менән тәьмин итергә тырышалар. Уҡыу­сылар һалдаттарҙың рухтарын күтәрер өсөн хаттар яҙа, балалар баҡсаларындағы бәләкәстәр һүрәттәр төшөрөп ебәрә.
Уйлап ҡараһаң, хәлдәр хас та Бөйөк Ватан һуғышы осорондағы кеүек. Тарих ҡабатлана икән. Яу йылдары ваҡытындағы кеүек, Донецк һәм Луганск республикаларынан эвакуациялан­ған етем балалар ҙа, йорт-ерһеҙ ҡалған мохтаждар ҙа килеп, һыйыныр урын таба. Беҙ­ҙекеләр емереклектәрҙе тергеҙергә, юлдар төҙөргә, мәктәп­тәр һалырға, дауаланыуҙың ни икәнен белмәгән халыҡҡа медицина ярҙамы күрһәтергә бара.
Былар барыһы ла ихлас кү­ңелдән башҡарыла. Кешеләр ауыр хәлдә ҡалыусыларға яр­ҙам ҡулы һуҙа.
Донъяны матурлыҡ ҡотҡара, тиһәләр ҙә, минеңсә, барыбер уны изгелек ҡотҡара.
Һәм тағы ла ирекмән тигән һүҙгә әйләнеп ҡайтайыҡ. Китап һөйөүселәр күренекле совет балалар яҙыусыһы Аркадий Гайдарҙың «Тимур һәм уның командаһы» тигән повесын, моғайын, беләләрҙер, уҡығандарҙыр. Ундағы геройҙар ҙа бит өлкән кешеләргә ярҙам итә. Рәхмәт өсөн дә, үҙҙәрен күрһәтергә теләүҙән дә түгел, ә мохтаждарҙы шатландырыу, изгелек ҡылыу өсөн башҡа­ралар уңған, тырыш балалар һәйбәт ғәмәлдәрен. Бөгөнгө ирекмәнлек хәрәкәте ана ҡайҙа барып тоташа. Беҙҙең халыҡ элек-электән бер-береһенә ҡарата ярҙамсыл булған: бура күтәр­һенме, бесән сапһынмы, утын ташыһынмы, өй йыу­һынмы, һуғым һуйһынмы – өмә яһап, күршеләренә, туғандарына, яңғыҙҙарға булышҡан, бар эштәрҙе лә бергә башҡар­ғандар. Шуға ла, ил төкөрһә – күл була, тип юҡҡа әйтмәйҙәр­ҙер.
Бөгөн, илебеҙгә төшкән һынау осоронда, айырыуса кәрәк ирекмәндәр ярҙамы.
Тик һуңғы ваҡытта, бигерәк тә баш ҡалабыҙ Өфөлә, «Тимурсылар» тигән яҙыу менән йыйылышҡан кешеләрҙе йыш күрергә тура килә. Улар – ҡай­ҙа, кемдә ниндәй эш бар, шуларҙы башҡарырға теләүселәр. Ләкин бушҡа түгел, аҡсаға, йәғни ялланып. Бөгөнгө заманда, бәлки, бындай хеҙмәт тә кәрәк­тер. Сөнки ашығыс эшең бул­ғанда, бер үҙең генә атҡарып сыға алмағанда әлеге кешеләргә яр­ҙам һорап мөрәжәғәт итергә мөмкин. Быға мин шәхсән ҡаршы түгелмен. Әммә «тимурсылар» тигән исем алыу­ҙарына һис кенә лә ризалаша алмайым. Тимурсылар – улар изгелек ҡылыусылар. Шулай булып күңелдәребеҙгә һеңеп ҡалған.
Әле лә тимурсылар хәрәкәте күп ауылдарҙа, шөкөр, йәшәп килә. Хәҙер балаларға өлкән ирекмәндәр ҙә ҡушылды. Шулай итеп, изгелек сылбыры дауам итә.
Ә һеҙҙә бармы тимурсылар, ирекмәндәр? Улар ниндәй эштәр башҡара? Һалдатҡа алын­ған ғаиләләргә ниндәй ярҙам күрһәтәһегеҙ? Изге ғәмәлдәрегеҙ хаҡында башҡаларға ла һөйләһәгеҙ, бәлки, улар ҙа һеҙҙән өлгө алып, тимурсы, ирекмән булып китер ине. Был эштәр – бөгөнгө заман талабы.

Азамат МӘҺӘҘИЕВ,
Рәсәй һәм Башҡортостан Журналистар союзы ағзаһы.

Фото: ufaved