Аҡ ҡына, йомшаҡ ҡына ҡуянға оҡшап, шул тиклем етеҙ, уңған үҙҙәре. Әммә һис кенә лә ҡурҡаҡ түгелдәр, бик ҡыйыу балалар йыйылған был синыфҡа.
Бишенселә 3 ҡыҙ һәм 13 малай уҡый. Үҙ-ара бик татыу, әүҙем улар. Мәктәптә ойошторолған бер саранан да ситтә ҡалмайҙар. Төрлө конкурстарҙа, акцияларҙа, флешмобтарҙа ла һынатмайҙар.
Маҡтағы ғына килеп тора үҙҙәрен. Мәҫәлән, Айназ Ҡулбирҙин – уҡыу алдынғыһы. Тик «бишле» билдәләренә генә өлгәшкән малай шиғырҙар ҙа яҙа. Ижад емештәре менән йыл һайын «Алтын ҡауырһын рыцарҙары» республика конкурсында ҡатнашып, призлы урындар яулай. Шулай уҡ Илзидә Вәлиева, Денис Хәсәнов, Сыңғыҙ Кинйәкәев, Динис Йәғәфәровтарҙың да уҡыуҙары яҡшы. Сәсән телле Денис Хәсәнов бер нисә йыл рәттән «Урал батыр» эпосын яттан һөйләүселәр бәйгеһендә ҡатнашып, күптәрҙе һоҡландырған. Ә Сыңғыҙ һүрәт төшөрөргә әүәҫ. Илмир Яубаҫаров матур йырлай, Арыҫлан һәм Рушан Мырҙабаевтар спорт буйынса шәп. Әйткәндәй, Арыҫлан – синыфтың старостаһы ла.
– Уҡыусыларым Яңы йылға бик ихлас әҙерләнде, күҙҙәре янып тора инде. Бик дәртлеләр. Күмәкләгән – яу ҡайтарған, тигәндәй, дәррәү генә ҡар бөртөктәре, төрлө биҙәктәр яһап, «һә» тигәнсе синыф бүлмәһен мөғжизәле әкиәт донъяһына әйләндереп тә ҡуйҙылар. Мәктәп алдына ҡарҙан һындар ҙа әүәләнеләр, – ти бишенселәр хаҡында синыф етәкселәре, урыҫ теле һәм әҙәбиәте уҡытыусыһы Азалиә Мөхәмәт ҡыҙы Самарбаева.
Уҡыусыларҙың «Йәншишмә» менән дуҫ булыуҙары ла ҡыуандырҙы. Күптәре гәзиткә киләһе йылға ла яҙылып ҡуйған. Вәт, афариндар!
Яңы йылда теләгән теләктәр ҡабул булыусан бит ул. Ҡуян йылына ниндәй өмөттәр бағлайһығыҙ, ниндәй мөғжизә көтәһегеҙ, тигән һорауға:
– Иң мөһиме – илебеҙҙә именлек, татыулыҡ булһын! Ҡуян бит тыныслыҡ ярата, – тип бер тауыштан яуапланы бишенселәр. Бәләкәй генә булһалар ҙа, ололарса фекер йөрөткән балаларға ҡарап һоҡланып ҡуйҙым. Йыл хужаһы булған «ҡуяндар»ҙың юрағандары юш килһен, Алла бирһә!
Ю. ФӘНИЛЕВА.