Ниңә халыҡ уйындары онотола?

Ҡыҙғанысҡа ҡаршы, хәҙерге ваҡытта балалар араһында элек-электән йәшәп килгән уйындар онотола бара. Ә халыҡ уйындары – иң ҡиммәтле мираҫтарыбыҙҙың береһе бит! Беҙҙең төп маҡсат – балаларға хәрәкәт талап иткән уйындарҙың файҙаһы тураһында аңлатыу эше алып барыу. Улар етеҙлек, йылғырлыҡ, осҡорлоҡ кеүек сифаттарҙы үҫтереү менән бергә эстетик тәрбиә лә бирә.
Ауылдың мәҙәниәт йортонда башланғыс синыф уҡыусылары өсөн «Халыҡ уйындары – иң ҡиммәтле мираҫ» исемле уйын-кисә үтте. Башҡорт халыҡ уйындары тураһында мәғлүмәт биргәндән һуң балалар менән рәхәтләнеп «Һәпәләк», «Йәшерәм яулыҡ», «Аҡ тирәк, күк тирәк», «Боҙоҡ телефон» уйындары уйнап, күңел булғансы башҡорт көйҙәренә бейеп ҡайттыҡ.

Вәлимә ҒӘЛИУЛЛИНА.
Бөрйән районы, Исламбай ауылы.