Көт... Йәшә...

...Уйлап ҡараһаң, беҙ ғүмер буйы нимәлер КӨТӘБЕҘ. Ҡасан ҙур булып үҫәбеҙ тип КӨТӘБЕҘ... Ҡасан мәктәпкә барабыҙ... Уҡыуға барғас, ҡасан мәктәпте бөтәбеҙ, тип КӨТӘБЕҘ... Ҡасан каникул була... Имтихандарҙың һөҙөмтәһен КӨТӘБЕҘ. Юғары уҡыу йортона инеү тураһында приказ КӨТӘБЕҘ...

Йыл башланып өлгөрмәй, Яңы йылды КӨТӘ башлайбыҙ. Әйтерһең дә, Яңы йылда бөтә яҡшылыҡтар ғына КӨТӘ беҙҙе... Тыуған көнөбөҙҙө КӨТӘБЕҘ. Ҡыш яҙҙы, яҙ йәйҙе КӨТӘБЕҘ. Шәмбе менән йәкшәмбене КӨТӘБЕҘ. Яңынан тормош башлар өсөн дүшәмбене КӨТӘБЕҘ. Аш бешкәнен, сәй ҡайнағанын КӨТӘБЕҘ. Сәй яһағас һыуынғанын КӨТӘБЕҘ.

Отпуск КӨТӘБЕҘ. Эш хаҡы КӨТӘБЕҘ. Премия булһа ине тип КӨТӘБЕҘ. Бәпес тыуһа ине, тип КӨТӘБЕҘ. Аҙаҡ атлап китеүен, һөйләшә башларын КӨТӨП бер булабыҙ...

Йылдар үтһә, пенсия КӨТӘ башлайбыҙ. Пенсияның артыуын КӨТӘБЕҘ. Балаларыбыҙ ҡайтыуын... Уңыш өлгөрөүен... Тауыҡ йомортҡа һала башлауын... Хыялдарҙың тормошҡа ашыуын... Матур ҡартлыҡ килеүен... Күңел һыҙлауы бөтөрөн, баш ауыртыуы үтерен... Дуҫыңдың һинән ғәфү үтенеүен... Туйға саҡырғандарын... Ҡояш сыҡҡанын... Кис еткәнен... Һуғыш бөтөүен. Яралар төҙәлеүен. Ҡәҙерле кешебеҙҙең йыраҡтан ҡайтыуын...

Беҙ һәр ваҡыт нимәлер КӨТӘБЕҘ. КӨТМӘЙЕНСӘ лә булмай шул. Еләкте бешкәнен КӨТМӘЙЕНСӘ, өҙмәйбеҙ, ашамайбыҙ... Икмәктең ҡабарғанын КӨТМӘЙЕНСӘ, мейескә тыҡмайбыҙ...

КӨТӘҺЕҢ, тимәк, йәшәйһең. Йәшәйһең икән, тимәк, барыбер нимәне булһа ла КӨТӘҺЕҢ...

Мәҫәлән, ошо юлдарҙы уҡығанда, ниндәй фекер менән тамамланыр икән был яҙма тип КӨТТӨҢ?..

КӨТ! ЙӘШӘ!

Гөлсөм МОНАСИПОВА.

Фото һәм сығанаҡ: ***Зөһрә Йондоҙ***