-4 °С
Болотло
Бөтә яңылыҡтар
Таныш булығыҙ
1 Февраль 2019, 13:42
Йырҙарын «Юлдаш»тан да яңғыраталар
Ринат Ғаззаловҡа – 12 йәш. VI синыфта уҡый. Республика йыр конкурстары лауреаты. Интернеттағы видеоларын ҡарап, аудиояҙмаларын тыңлап, ҡайһылай матур йырлай, тип үҙе менән яҡындан танышҡайным, ҡулынан килмәгән эше юҡ икән Ринаттың. Күҙ теймәһен: бик шәп егет үҫеп килә. Хәйер, яҙмышы ла үҙенсәлекле генә уның.
Ринат өләсәһе Таңһылыу Ғаззалова һәм етәксеһе Зилә Лира менән.
Атаһы яҡты донъянан китеп, әсәһе икенсегә тормошҡа сыҡҡас, Ринат ике йәштән өләсәһе менән олатаһында йәшәй башлаған. Ә улар Силәбе өлкәһендә донъя көткән була. Ейәндәре балалар баҡсаһына йөрөй. Шул саҡта уҡ сараларҙа өс куплетлы шиғырҙар ятлай. 3 – 4 йәшенән йырлай башлай. Өләсәһе менән олатаһы – Таңһылыу һәм Илшат Ғаззаловтар хаҡлы ялға сыҡҡас, тыуған ауылдарына – Әбйәлил районы Рәхмәткә ҡайта.
– Ринат ул саҡта урыҫса ғына һөйләшә ине. Уҡый башлағас, матур итеп башҡортса ла өйрәнде. Мәктәпкә барғансы уҡый-яҙа, 100-гә тиклем һанай белә ине. Бер ваҡыт беҙҙең менән йырлап ҡына һөйләшә башланы. Нимә әйтһәң дә, йыр менән яуап бирә бит әй. Шундай ҡыҙыҡ малай ул. Яратҡан фәндәре – математика, урыҫ теле. Район олимпиадаларында ла ҡатнашты. Шахмат уйнарға әүәҫ, ағайҙарының ҡаланан ҡайтҡанын көтөп кенә йөрөй инде, улар менән көс һынаша. Олатаһы менән 3 – 4-әр сәғәт ултыралар. Мәктәптә I урында булды. Ғөмүмән, спортты ныҡ ярата, саңғыла йөрөй, йүгерә, велосипедта, мотоциклда елдерә. Әле түҙемһеҙлек менән йәйҙе көтә: сөнки быйылдан ағайҙары техникаға ултыртырға вәғәҙә итә, – ти өләсәһе Таңһылыу апай.
Ринат бик ҡыҙыҡһыныусан, сәмле егет булып сыҡты. I синыфта уҡығанда уҡ бәйләргә өйрәнгән икән. Үҙенә шарф бәйләп алыу уға бер ни тормай! Өлгө алырға кәрәк, ҡыҙҙар! Өләсәһе – һөнәре буйынса ашнаҡсы, өйҙә гел бешеренә, Ринат та һәр саҡ янында. Бөтә ҡамыр ризыҡтарын да эшләшә. Бешерә белә, бутҡаларҙы үҙе генә әҙерләй. Кейем-һалымын таҙа ғына итеп йөрөтә, төймәләрен дә үҙе тағып ҡуя: «Былар миңә киләсәктә кәрәк буласаҡ», – ти буласаҡ һалдат.
– Былтыр мәктәпкә хеҙмәт уҡытыусыһы килгәйне. Дәрестәрен оҡшатты бит Ринат. Ағастан төрлө уйынсыҡтарҙы бик килештереп, оҫта итеп яһарға өйрәнде. Танк, самолёт, «Беларусь»… Шулар менән конкурста ла ҡатнашты. Һәр ваҡыт беҙҙең менән, нимә эшләһәк тә ҡарап, өйрәнеп йөрөй. Хатта һыйыр ҙа һауа минең ейәнем! Баҡса үҫтереү серҙәрен дә беҙҙең кеүек үк белә. Тышта эшләгәндә гел йырлап йөрөй. Шунан оло йәштәге күршеләребеҙ, ҡысҡырыбыраҡ йырла әле, ти. Сөнки Ринат йәшлек йырҙарын башҡара, олатаһы өйрәтә бит. «Сайҡалалар кәмәләр», «Имәндәр шаулай», «Тыуған ауылым», «Ҡышҡы романс»… Бәләкәй генә сағынан концертта «Әсәйемә» тигән йырҙы йырланы. Хәсән Усманов та йырлай бит, уның менән дуҫлашып, минусовкаһын алдылар, – Таңһылыу апайҙың ейәне тураһында һөйләр һүҙе күп.
Эйе, ауылдаштары Ринаттың сығыштарын яратып ҡабул итә. Хоҙай тарафынан бирелгән талант, матур, моңло тауыш малайҙа. Әммә һәләтте лә ҡәҙерләргә, үҫтерергә кәрәк. Юғиһә, юғалып ҡалыуы бар. Ринат Ғаззаловтың бәхетенә, ауылға танылған йырсы Зилә Лира килә. Ҡустыһы ҡаты ауырып киткәс, Рәхмәткә барып йәшәргә тура килә уға. Клубҡа эшкә урынлаша. Ә Ринат концерттарҙа йырлай. Талантлы малай менән Зилә Мазһар ҡыҙы үҙе шөғөлләнә башлай. Вокал буйынса ғына түгел, хореография буйынса ла дәрестәр бирә. Йәш йырсы ҡанатланып китә, Зилә апаһын бик ярата, репетицияларға йүгереп бара. Бөтә өйрәткәнде тиҙ генә отоп алып, нәҡ уҡытыусыһы ҡушҡанса үтәй. Дикция өҫтөндә лә эшләйҙәр. Йырсының һәр һүҙе аңлайышлы булырға тейеш. Ринаттың тыны оҙон, йырҙы еренә еткереп башҡара.
– «Сулпылар» йыр конкурсында ҡатнашырға булдыҡ. Һайлап алыу турына «Ҡышҡы романс»тың яҙмаһын ебәрҙек. Өлкәндәр йыры бит инде, ә Ринат әле малай ғына. Уға, һин был йырҙы олатайың менән өләсәйеңә арнап йырла, уларҙың үткән ғүмерен күҙ алдына баҫтыр, тим. Йөрәгең аша үткәреп, кисереп, башҡарырға кәрәк. Матур итеп йырланы. Оҡшаттылар. I турҙа ла ошо уҡ йырҙы яратып башҡарҙы. «Ирәндек моңдары» республика бәйгеһендә лә ҡатнашырға булдыҡ. «Үткән ғүмер», «Бер алманы бишкә бүләйек» тигән халыҡ йырҙарын әҙерләнек һәм Ринат III дәрәжәле диплом алды. «Сулпылар»ҙың II турында «Ырыуыбыҙ – күбәләк» йырын башҡарҙыҡ. Ринат үҙен сәхнәлә иркен тоторға, бейеп йырларға ла өйрәнде. Конкурста I урын алыуына бик шатмын, – ти Зилә Мазһар ҡыҙы.
Хореография буйынса ла белеме булғас, остазы Рәхмәт ауылында эшләгән ваҡытта һәүәҫкәрҙәрҙе «Байыҡ» бейеү конкурсына ла әҙерләгән. Хатта XI синыф уҡыусыһы Ынйы Мансурова үткән йылда Гран-приға лайыҡ булды. Әммә Өфөгә ҡайтыр ваҡыт етә. Быға бөтәһенән дә нығыраҡ Ринат бошона. Шунда уҡытыусыһы уның менән етди генә һөйләшергә ҡарар итә. Киләсәген йыр менән бәйләргә теләгән кешегә Өфөгә Ғәзиз Әлмөхәмәтов исемендәге республика музыка интернат-гимназияһына уҡырға инеү мөмкинлеге, музыкаль белемдең мөһимлеге тураһында әйтә. Йырсы булырға хыялланған малай баш ҡалаға барып уҡырға ҡарар итә һәм имтихандарҙы яҡшы биреп, теләгенә ирешә. Уны, тыны оҙон булғас, саксофон синыфына алғандар. Фортепьянола уйнарға өйрәнеү мотлаҡ, бынан тыш, ҡурай, театр түңәрәктәренә йөрөй. Француз телен яратып өйрәнә, саксофонда итальян көйөн башҡара. Ринат урыҫ, инглиз телдәрендә лә йырлаясаҡ, Алла бирһә. Әйткәндәй, «Юлдаш» радиоһында ике йырының яҙмаһы бар. «Ҡышҡы романс» һәм «Ырыуыбыҙ – күбәләк»те радио аша ишетә алаһығыҙ.
Әлбиттә, малай үҙе шаяртып әйткәнсә, бында һағынырға ла ваҡыт юҡ, яратҡан сәнғәт донъяһына килеп эләгеүе менән бик бәхетле тоя ул үҙен. Яратҡан уҡытыусыһы Зилә Лира менән йыр буйынса шөғөлләнеүҙәрен дә дауам итәләр. Ринат Ғаззаловҡа яңынан-яңы бейеклектәр теләйбеҙ.
Эльвира ӘСӘҘУЛЛИНА.
Читайте нас:
Редакция һайлауы
Новости партнеров
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж