-5 °С
Болотло
Бөтә яңылыҡтар
Таныш булығыҙ
5 Февраль 2021, 13:10
Иҫегеҙҙә ҡалдырығыҙ: Cергей Макаров!
Өфөнөң «Үҙәк баҙар» туҡталышында ҙур сумка йөкмәгән, ҡулына сәкән тотҡан малай троллейбусҡа килеп инде. Ул «Салауат Юлаев» хоккей командаһы кейемендә ине. Ҡыҙыҡһынып, йәш спортсы менән һөйләшә башланым.
– Нисәнсе йыл шөғөлләнәһең?
– Етенсе.
– О-о! Үҙең нисәнсе синыфта уҡыйһың һуң?
– Бишенсе.
– Улай булғас, мәктәпкә барғансы уҡ йөрөй башлағанһың?
– Эйе.
– Ә ҡайһы мәктәптә белем алаһың?
– 16-сы.
– Аҙнаһына нисә тапҡыр шөғөлләнәһегеҙ?
– Алты.
– Нисәшәр сәғәт?
– Бер сәғәт тә ун биш минут.
– Нисәлә йоҡонан тораһың?
– Етенсе яртыла.
– «Салауат Юлаев» хоккей командаһы уйынсылары араһынан кемдең уйыны нығыраҡ оҡшай?
– Хартикайнендыҡы.
– Үҙең дә киләсәктә уның кеүек оҫта булырһың әле. Исем-фамилияңды киләсәктә гәзит биттәрендә күрергә яҙһын, – тигән булам.
– Рәхмәт, – тип баҫалҡы ғына йылмайҙы ла буш урынға барып ултырҙы үҙен Макар Сергеев тип таныштырған үҫмер.
Ул арала «Аграр университеты» туҡталышына килеп еттек. Троллейбусҡа байтаҡ кешеләр менән бергә бер өлкән йәштәге инәй ҙә инде. Кондукторға «Алға» картаһын бирҙе. Ә тегеһе:
– Бында һеҙҙең аҡсағыҙ етмәй, 15 һум ғына, – тине.
Инәй нимәлер аңлатырға тырышты. Тик кондуктор һаман үҙенекен ҡабатланы:
– Бына бит, аппарат чек сығарҙы, 15 һум тигән, картағыҙҙа аҡсағыҙ бөткән. Сығығыҙ троллейбустан.
Аптыраған инәй:
– Улайһа, асығыҙ ишегегеҙҙе, – тине.
Инәй ишеккә табан ҡуҙғалғайны ғына әлеге хоккейсы малай тиҙ генә урынынан тороп, кондукторға үҙенең картаһын бирҙе лә:
– Бына минең картанан алығыҙ уға юл хаҡын, – тине.
Инәй аптырап:
– Кәрәкмәҫ ине, – тигән булды. – Рәхмәт инде, балаҡай...
Троллейбус эсендә ултырған күпме оло кешенең башына ла инмәгән изге эште ошо бишенсе синыфта ғына уҡыған үҫмер малай башҡарҙы. «Һуң, беҙ ҙә шуны эшләй ала инек бит», – тип уйлағандыр, бәлки, шул саҡ битараф ҡалған өлкәндәр. Әммә... уларға өлгө күрһәтте Макар Сергеев исемле йәш хоккейсы. Уның был ҡылығы тәрбиәле ғаиләлә үҫкәнлеген дә күрһәтте. Афарин, Макар! Спортта ла шулай ғәҙел бул. Киләсәктә һиңә ҙур уңыштар, еңеүҙәр кисерергә яҙһын. Балаларына бәләкәйҙән спортҡа һөйөү уятып, мәктәпкә барғансы уҡ, 5 йәштән, хоккейға йөрөткән, әллә күпме кәрәкле кейемдәрен алған (хоккейҙы бик ҡиммәт спорт төрө тип юҡҡа ғына әйтмәйҙәр) ата-әсәһенә лә рәхмәт әйтмәй мөмкин түгел. Балаларына ҡарата булған иғтибарҙары яуапһыҙ ҡалмаҫ, иншалла.
...Макар арыған ине. Күҙҙәре йомолоп-йомолоп ала. Йыш ҡына иҫнәп тә ҡуя.
Туҡталышын үтеп китмәҫ өсөн тәҙрәгә ҡарап-ҡарап ала. Минән алда төшөп ҡалды ул. Ҡулына сәкән тотҡан, кейемдәре, тимераяҡтары һалынған ауыр сумкаһын һөйрәп киткән малай артынан һоҡланып ҡарап ҡалдым. Иҫегеҙҙә ҡалдырығыҙ: Макар Сергеев! Киләсәктә уның менән осрашырһығыҙ әле! Амин, шулай булһын!
Зөһрә ҠОТЛОГИЛДИНА.
Читайте нас:
Редакция һайлауы
Новости партнеров
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж