Һәр ауыл халҡы оҫталары ҡул эштәрен күргәҙмәгә ҡуйған, боронғо кәсептәрен күрһәтте. Бер тирмә айырыуса үҙенсәлеге менән йәлеп итте. Унда сәнғәт мәктәбендә шөғөлләнеүсе балаларҙың ижадтары ҡуйылғайны. Бигерәк тә рамкалағы картиналар һоҡландырҙы. Бөтә был эштәрҙең авторы IX синыфты тамамлаған Катя Захарова ине. Ана, үҙе мольберт артында көҙгө пейзажды һынландыра. Күмер менән төшөрөлгән һүрәттең үҙенә тартып торған ниндәйҙер көсө бар. Йәш рәссам ябай ғына бер һыҙыҡты ҡағыҙ битенә һылау менән картина күҙгә күренеп байый бара.
Балаҡатай районы хакимиәте башлығы Мәсхүт Рәшит улы Миңлеғәлин оҙатыуында Башҡортостан Республикаһы Хөкүмәтенең Премьер-министр урынбаҫары Азат Шамил улы Бадранов, торлаҡ-коммуналь хужалыҡ министры урынбаҫары Илдар Хәниф улы Хәмзин, Дәүләт Йыйылышы – Ҡоролтай депутаты Рәшит Фидаил улы Ғәтиәтуллин, шағирә һәм журналист Зөһрә Ҡотлогилдина, Балаҡатай ерендә тыуып үҫкән йәш талантлы шағир Александр Хватковтар Катя Захарованың ижадына һоҡланыуҙарын йәшермәне, хатта уның эштәрен һатып алырға теләк белдереүселәр табылды.
– Катя сәнғәт мәктәбендә өс йыл элек кенә шөғөлләнә башланы, – тине уның уҡытыусыһы Ирина Сергеевна Никитина. – Ошо ҡыҫҡа ғына ваҡыт эсендә ул ҙур уңыштарға өлгәште. Натюрморт, портрет, пейзаж – һынлы сәнғәттең бөтә төрҙәрен үҙләштерҙе. Акварель, майлы буяу, ҡәләм, күмер менән төшөрөргә ярата. Уның эштәре район, республика, Рәсәй һәм халыҡ-ара конкурстарҙа ла еңеүҙәр яуланы.
Катяның ата-әсәһе Татьяна менән Сергей ҙа ҡыҙҙарының һәләтен үҫтерергә тырыша. VII синыфты тамамлаған ҡустыһы Кирилл да апаһының эштәрен ҡарап туймай. Улар бит өйҙөң йәме булып биҙәп тора.
Катя Захарова IX синыфты тик «бишле» билдәләренә генә тамамлаған. Артабан яратҡан шөғөлөнән айырылмаҫ өсөн Өфөләге дизайн һәм сервис колледжында белем алырға теләй.
– Каникул ваҡытында баш ҡалаға махсус килеп, колледж менән таныштым, ҡабул итеү шарттарын, имтихандар хаҡында белдем, – ти Катя. – Август башында башлана һынауҙар. Уға тиклем ваҡытым бар, тағы ла яңы һүрәттәр төшөрөргә өлгөрөрмөн, тип уйлайым.
Балаҡатай ере – таланттарға бай төбәк. Мәҫәлән, Башҡортостан Республикаһының Гербы авторы Фазлетдин Ислахов та – ошо райондың Яңыбай ауылынан. Шулай уҡ унда Рәшит Ғәлимов исемле ғәжәп талантлы рәссам тыуған. Ул – республикабыҙҙағы бик күп музейҙарҙы эшләүҙә, ҡыл-ҡумыҙ, думбыра кеүек онотолоп барған милли уйын ҡоралдарыбыҙҙы тергеҙеүҙә күп көс һалған шәхес. Әйткәндәй, рәссамдың эшен әле уның ҡыҙы Гөлнур Ғәлимова дауам итә.
Һанай китһәң, күп күренекле кешеләре менән данлыҡлы Балаҡатай ере. Әлеге Яңыбай ауылынан иҡтисад фәндәре докторы Вәҡифә Хәйруллина, виртуоз баянсы Миңләхмәт Ғәйнетдинов, Үтәш ауылынан телевидение дикторы Флүрә Мурзина, оҙаҡ йылдар «Тамыр» телеканалында эшләгән Фәрхәт Ғәйнетдинов...
Киләсәктә Ямаш ауылы ҡыҙы Катя Захароваға ла ошо исемлекте дауам итергә яҙһын. Уға имтихандарын уңышлы тапшырып, уҡырға инеп китеүен теләйбеҙ.
Һүрәт төшөрөү – ул хыялыңды ҡағыҙға күсереү, тигән бер аҡыл эйәһе. Хыялдары ла, тормошо ла палитра төҫтәре кеүек сағыу булһын Катяның.
З. МӘҺӘҘИЕВА.
Балаҡатай районы.