+12 °С
Ямғыр
Бөтә яңылыҡтар
Тирмәкәй
30 Август 2019, 12:46
Сочиҙан еңеп ҡайтҡандар
Күмертау ҡалаһындағы Мөхәмәт Исҡужин исемендәге прогимназия тураһында ишеткәнегеҙ бармы? 1994 йылда 13-сө урта башҡорт мәктәбе булараҡ асыла ул. 2000 йылда педагог-мәғрифәтсе Мөхәмәт Исҡужин исеме бирелә. Ә 2009 йылда башланғыс мәктәп итеп үҙгәртелә. Әле ул прогимназия тип йөрөтөлә. Үҙенең балалар баҡсаһы ла бар. Унда 45 ҡыҙ һәм малай йөрөй. Директоры – Әнисә Сәғит ҡыҙы Түләгәнова.
Ҡала ерендә балаларҙы башҡортса һөйләштереүе ҡыйыныраҡ. Сөнки үҙ-ара туған телдә аралашып бармайҙар. Өйҙә һөйләшеү генә етмәй шул. Ә Мөхәмәт Исҡужин исемендәге 13-сө прогимназияла бөтә байрамдар, саралар башҡортса алып барыла. Уҡытыусылар тәнәфестәрҙә лә кескәйҙәрҙе туған телдә генә һөйләшергә өндәй. IV синыфтан һуң рухлы ҡыҙҙар һәм малайҙар 3-сө республика башҡорт интернат-гимназияһын йәки республика политехник интернат-лицейын һайлай.
Әле яңы уҡыу йылына I синыфҡа 50 уҡыусы киләсәк. Белем усағында уларға яҡшы тәрбиә, сифатлы белем биреү өсөн педагогтар бар көстәрен һала. Уҡыусылар иһә төрлө конкурстарҙа ҡатнашып, прогимназияның данын күтәрә.
Ағалы-ҡустылы Рәсүл һәм Арсен Мозафаровтарҙың Сочиға барып, ғилми проекттарҙы һәм эҙләнеү эштәрен яҡлау конкурсында ҡатнашып, I дәрәжә диплом яулап ҡайтыуы ҡыуаныслы күренеш. Тәүҙә улар Мәләүездә үткәрелгән «Мин – эҙләнеүсе» Бөтә Рәсәй бәйгеһендә еңгән. Ғилми эштәре нимә тураһында, тиһегеҙме? Мәләүез ҡалаһында, йәғни сәнәғәттә, етештерелгән елемде үҙҙәре йорт шарттарында яһағаны менән сағыштыралар.
Әле IV синыфҡа барасаҡ Рәсүл мәктәп, ҡала, республика, Рәсәй кимәлендә үткәрелгән төрлө олимпиада, конкурстарҙа әүҙем ҡатнаша, һәр саҡ еңеүҙәр яулай икән. 2018 – 2019 уҡыу йылында Гагарин кубогына ойошторолған олимпиаданың муниципаль турында тирә-яҡты өйрәнеү фәненән иң-иңе булһа, информатиканан II урын алған. Шулай уҡ уҡытыусыһы Гөлназ Сәғит ҡыҙы Әмирғәлина етәкселегендә Башҡорт дәүләт университетының Стәрлетамаҡ филиалында республика кимәлендә үткәрелгән эҙләнеүселәр конкурсында II дәрәжә диплом менән бүләкләнгән.
– Был бәйге юғары синыф уҡыусылары араһында үткәрелһә лә, Рәсүл бик лайыҡлы сығыш яһаны, – тип маҡтайҙар үҙен.
Белем усағында Гөлназ Сәғит ҡыҙы етәкселегендә йыр ансамбле бар. Уҙған уҡыу йылында был коллектив ҡала кимәлендә үткәрелгән «Торналар оса», «Яҙғы тамсылар» конкурстарында ҡатнашып, II һәм III дәрәжәле дипломдар яулап һөйөнгән.
Ҡалалағы башланғыс синыф уҡыусылары араһында бөтә төр ярыштарҙа алдынғылыҡты бирмәйҙәр икән. Пионербол, квадрат уйындарында, саңғы ярышында ла еңеүселәр рәтендә улар. Малайҙар «Көрәш» секцияһында ныҡлап шөғөлләнә. Ҡала, район буйынса үткәрелгән ярыштарҙа ҡатнашып, еңеүҙәр яулайҙар.
– Йыл буйына матур саралар ойошторабыҙ. Республика көнөн ҙурлап уҙғарабыҙ. Был байрамда яттан шиғыр һөйләүселәр, тыуған яҡ тәбиғәтенең хозурлығын буяуҙар менән һүрәтләүселәр, инша яҙыусылар конкурстары үткәрелә. Йыл һайын синыфтарҙа Уҡытыусылар, Әсәйҙәр көнөнә арнап матур байрам ойошторола, бергәләп башҡортса Яңы йыл байрамын үткәреү барыһына ла бик оҡшай. Шулай уҡ «Атай, әсәй һәм мин – спорт һөйөүсе ғаилә» ярыштарында спорт менән дуҫ ғаиләләребеҙ әүҙемлек күрһәтә, ихлас ҡатнашалар. Уҡыу йылы аҙағында бөтә мәктәп уҡыусылары, ата-әсәләр менән берлектә «Кәкүк сәйе» байрамына сығып, тәбиғәттә, саф һауала ял итеп, күңелле уйындар уйнап, бәйгеләрҙә ҡатнашыу барыһының да күңеленә хуш килә, – ти уҡытыусы Гүзәл Йәмилева.
– Беҙҙең IV «Б» синыфынан Илнара Фәйзәлиева ҡала һәм республика кимәлендә ҙур уңыштарға өлгәшә. Был көслө ихтыярлы ҡыҙ 500 тапҡыр ергә ятып күтәрелеп, ҡалала ҡыҙҙар араһында рекорд ҡуйҙы. Гагарин кубогына республика олимпиадаһында физкультура буйынса III урын һәм иҫтәлекле миҙал алды. Яҡшы уҡыуы, тырышлығы менән башҡаларға өлгө булып тора. Синыфташтарын һәр ваҡыт спортҡа өндәп, дөрөҫ күнекмәләр эшләргә өйрәтә. Ғаиләләре менән Рәсәй ГТО ярышында юғары һөҙөмтәләр күрһәттеләр. Илнара үҙе 2018 йылда ГТО буйынса Ағиҙел ҡалаһында үткән III ҡышҡы фестивалдә еңеүгә иреште, – тип Вәсилә Ғәбитова ла, уҡыусыһы менән ғорурланып, һүҙгә ҡушылды.
Яңы уҡыу йылын яҡшы кәйеф менән ҡаршы алалар. Мөхәмәт Исҡужин исемендәге 13-сө прогимназия уҡыусыларының алдағы уҡыу йылында ла һынатмауҙарын, шулай рухлы, тырыш булып үҫеүҙәрен теләйбеҙ.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж