Байрамды ашҡынып көтә

Яңы йылды һәр кемебеҙ көтөп ала. Баш ҡалабыҙҙың 96-сы лицейында III синыфта уҡыусы Амалиә Яҡупова ла уның тиҙерәк етеүен теләй.

Белем усағында Шыршы байрамы үткәрелмәһә лә, өйҙә яҡындары – ата-әсәһе, бер туғандары менән Яңы йылды матур итеп ҡаршы аласаҡтар. Етмәһә, быйыл әрме сафында хеҙмәт итеп ҡайтып, Руслан ағаһы ла бергә буласаҡ. Ә ҡышҡы каникул башланғас, ҡыҙ боҙ ҡаласыҡтарында уйнап, тауҙа шыуып та рәхәтләнәсәк. Шундай күңелле мәл бит ул!

Зилә Флорит ҡыҙы менән Фәнил Миңләхмәт улы ғаиләһендә үҫкән Амалиә һүрәт төшөрөргә лә бик ярата. «Аҡбуҙат» журналы биттәрендә рәсемдәре сыҡҡаны ла бар. Бәлки, киләсәктә рәссам да булып китер әле үҙе.

Ҡыҙыҡһыныусан, теремек, тырыш ҡыҙ – әсәһенең дә оло ярҙамсыһы. Өйҙө йыйыштырырға, һауыт-һаба, иҙән йыуышырға өлгөрә ул. Маладистан башҡа ни әйтәһең инде. Алдағы йылдарҙа ла ата-әсәһен ҡыуандырып торһон, бәхетле бала булып үҫһен!

Гөлсөм ХИСМӘТОВА.

Өфө ҡалаһы.

Читайте нас: