Быйылғы конкурста беҙҙең төркөм тәрбиәләнеүсеһе – тыйнаҡ, матур ҡыҙыбыҙ Милена Солтанова ла үҙен һынап ҡараны. Эльза Варшилованың «Башҡортостан» шиғырын тасуири итеп һөйләп, «Иң яғымлы башҡарыусы» номинацияһында еңеү яуланы ул. Тәрбиәләнеүсебеҙҙең уңышына ныҡ һөйөндөк.
Милена – ғаиләләрендә берҙән-бер бала. Ата-әсәһенең һөйөүөнә төрөнөп, иркәләнеп, наҙланып ҡына үҫеп килә. Ҡалала йәшәһәләр ҙә, башҡортса таҙа һөйләшә, күп шиғырҙар, йырҙар белә. Һүрәт төшөрөргә лә әүәҫ. Әүҙемлеге, ҡыйыулығы менән тиҫтерҙәренән айырылып тора.
Ғөмүмән, Милена йөрөгән өлкәндәр төркөмө балалар баҡсаһында уҙғарылған һәр сарала һынатмай. Баҡса мөдире Земфира Рәшит ҡыҙы Хәсәнова менән өлкән тәрбиәсе Әлмира Фәрит ҡыҙы Шәмсетдинова уларҙы маҡтап бөтә алмай.
Артабан да шулай тырышып, кескәй йөрәктәрҙә туған телгә, илгә, мәҙәниәтебеҙгә һөйөү тәрбиәләп, ҡыҙҙар һәм малайҙарҙы мәктәп юлына әҙерләүҙе дауам итәсәкбеҙ. Ә бәләкәс Миленабыҙҙың был уңышы ҙур бейеклектәрҙең башы булһын!
Альбина СӘЙФУЛЛИНА, тәрбиәсе.
Өфө ҡалаһы, 152-се башҡорт балалар баҡсаһы.