Бәләкәстәр беҙҙә күп нәмәгә өйрәнде: үҙҙәрен тәртипле тоторға, ололарҙы хөрмәт итергә, һәр ваҡыт ярҙамсыл булырға. Ә иң мөһиме – туған телебеҙҙе, мәҙәниәтебеҙҙе, үҙебеҙҙең ғөрөф-ғәҙәттәребеҙҙе хөрмәт итә, белеп үҫә кескәйҙәр!
Иғтибарлы, ҡурсалаусы, һиҙгер тәрбиәселәр ярҙамында балалар баҡсаһы осоро һиҙелмәй ҙә үтеп китте. Тәрбиәләнеүселәребеҙ ҡала һәм республика кимәлендә бик күп уңыштарға өлгәште. Мәҫәлән, «Сулпыҡай» төркөмө «Һаумы, һаумы, әкиәт!» донъя халыҡтары әкиәттәрен туған телдә һөйләү конкурсында матур сығыш яһаны. Ә «Тамсыҡай» һәм «Ҡарлуғас»тар «Илһам», «Речитайка» шиғриәт бәйгеләрендә һынатманы. Шулай уҡ күптәр «Киндер һуғыу», «Ҡаҙ өмәһе», «Ҡурайға дан» кеүек фольклор байрамдарының әүҙем ҡатнашыусыһы булды.
Барлыҡ сығарылыш төркөмдәрендә юғары категориялы тәрбиәселәр эшләй. Әйткәндәй, «Сулпыҡай» төркөмө тәрбиәсеһе Эльзида Рафаэль ҡыҙы Хөснөтдинова – «Башҡортостандың баш ҡалаһы мәктәпкәсә белем биреү ойошмаһы йыл педагогы» ҡала һөнәри конкурсының «Туған телгә өйрәтеүсе йыл тәрбиәсеһе» номинацияһында еңеүсе, Кескәйҙәрҙең балалар баҡсаһында алған тәүге белемдәре алдағы мауыҡтырғыс мәктәп тормошонда ныҡлы ҡанат булыр, тип ышанабыҙ.
Аҡ юл һеҙгә, ҡыҙҙар һәм малайҙар!
Мәйсәрә ХАММАТОВА, өлкән тәрбиәсе.
Өфө ҡалаһы,
308-се башҡорт балалар баҡсаһы.