Уйындың аңлатмаһы. Көтөүсенең күҙен бәйләп иҙән йәки түңәрәк уртаһында ҡалдыралар, ә үҙҙәре ситкә китеберәк ултырышалар ҙа шыбыр-шыбыр һөйләшәләр, йүтәлләйҙәр, ҡайһы саҡта көлөп ебәрәләр. Күҙе бәйләнгән урынынан ҡуҙғалмай ошо тауыштарҙан танып, кемдең ҡайҙа ултырғанлығын тапҡырларға тейеш. Әгәр ул береһен дә тапҡырлай алмаһа, уларҙы көлдөрөргә тырыша, берәүгә төбәп түбәндәгеләрҙе әйтә:
– Ары лап-лап, бире лап-лап,
Кейеҙ ҡаплап, һөңгө һаплап,
Ана тора, быҙау кеүек мөңрәп, бышлап.
Ул күрһәткән яҡта кеше булмаһа, йәнә әйтә:
– Оҙон аяҡ торналай,
Тора шунда бурҙайҙай,
Бик көлөшкәс һин улай,
Сабит түгелме, ағай? – тип төҫмөрләгән кешенең исемен әйтә. Әгәр дөрөҫ әйтһә, шул кешенең күҙен бәйләйҙәр. Балалар урындарын алмаштыра һәм уйын яңынан дауам итә.
Ишмөхәмәт Ғәләүетдиновтың «Башҡорт халыҡ балалар уйындары» китабынан.