Кескәй саңғысылар

Димаға – 7, Женяға – 4, ә кескәй Әминәгә – 3 йәш кенә. Улар ҡышҡы һыуыҡтан бер ҙә ҡурҡып тормай. Саф һауала рәхәтләнеп саңғы шыуалар.
Атайҙары Александр Орлов махсус хәрби операцияла батырҙарса һәләк булған. Әсәй­ҙәре Гөлсәриә Төхвәт ҡыҙы балаларҙы яңғыҙы тәрбиәләй. Әле бына ул кескәйҙәргә саңғы алып биргән икән.
– Балаларҙың нисек ҡыуанғанын күрһәгеҙ! Бына бөгөн бергәләп саңғы шыуырға сыҡтыҡ. Ныҡ күңелле булды. Мин үҙем дә саңғыла йөрөргә яратам, – ти тәрбиәсе апайҙары Миңзәлә Мират ҡыҙы Үҙәнбаева.
Дима Орлов – балалар баҡсаһының ғорурлығы. Бөтәһен дә һоҡландыра ул. Шәп спортсы, шашка буйынса район ярышында гел призлы урын яулай. «Беҙ – гагаринсылар» республика конкурсының төбәк-ара этабына сыҡҡан. Был бәйгелә лә уға уңыш юлдаш булһын.
Женя менән Әминә ағайҙарынан өлгө ала. Уларҙы Дима ҡарап ҡына йөрөтә.

Зөһрә ИҪӘНДӘҮЛӘТОВА.
Баймаҡ районы, Ғүмәр ауылы.