Мәктәптә лә һынатмаҫ улар

Бер йыл буйы тәрбиәсе апайҙары Әлиә Вәхит ҡыҙы Сәйетғәлина уларҙы бәйгегә ныҡлы әҙерләй. Балалар атай-әсәйҙәре менән әкиәтте лә, эпосты ла уҡып сыҡҡан, йәнһүрәтте лә ҡарай. Уларға Һаҡмар, Нөгөш, Иҙел, Урал батыр, Һомай тураһында аңлатып бирәләр. Тау, бөркөт, ҡаялар, мәмерйә һындары эшләнелә. Һәр балаға кос­тюм тектерелгән.
Самира Хамматова Һомай ролен мөкиббән китеп башҡара. Авторҙың һүҙҙәрен Эмилия Сабитова һөйләй. Һомай менән Уралдың балалары Яйыҡты Искәндәр Шөғөров уйнай. Уның тауышы көр, ҡалын, килештерә генә. Нөгөштө иһә – Рамаҙан Ноғоманов, Һаҡмарҙы – Әнүәр Түлебаев, Иҙелде Руслан Баймырҙиндар оҫта башҡар­ҙы. Ә Урал батыр ролендә Илдар Дауытов сәхнәне бер итә. Һәр ролгә музыкаль етәксе Гөлназ Ринат ҡыҙы Ғүмәрова композитор Урал Иҙелбаевтың көйҙәрен тап килтереп һайларға тырышҡан.
– Сәхнәләштереүҙә ярҙам иткән режиссёр Илүзә Мөҙәрис ҡыҙы Шәйәхмәтоваға, атай-әсәйҙәргә, өләсәйҙәргә оло рәхмәтемде еткерәм. Бер аҙ моңһоу ҙа күңелгә, был балалар быйыл мәктәпкә I синыфҡа уҡырға бара. Тормошта изгелек һәр саҡ яуызлыҡты еңеүен, тәбиғәткә, йыһаныбыҙға һаҡсыл ҡарашта булыу кәрәкте улар хәҙер яҡшы аңлай. Кескәйҙәргә тик уңыштар ғына насип булһын, – ти тәрбиәселәре Әлиә Вәхит ҡыҙы.
«Тирмәкәй»ҙәрҙең мәктәптә лә һынатмаҫтарына иманыбыҙ камил!