Үҙенсәлекле өҫтәл уйыны!

Уйындың маҡсаты – балаларҙың тыуған ере һәм уның иҫтәлекле урындары тураһында белемен киңәйтеү. Бәләкәс уйынсылар Башҡортостан картаһы рәүешендәге майҙанда фишка ырғытып йөрөй. Юлда тәбиғәт ҡомартҡыларын һүрәтләгән фотолар менән “осраша”. Бала уларҙы танырға тейеш. Һәр карточканың артында текст бар. Был уйын ярҙамында кескәйҙәр Салауат Юлаевҡа, Миңлеғәле Шайморатовҡа ҡуйылған һәйкәлдәр, Дуҫлыҡ монументы, Ете ҡыҙ фонтаны менән таныша, Шүлгәнташ, Янғантау, Ирәмәл тураһында белем ала.

Балаларға был уйын бик оҡшай, ти Лилиә Ринат ҡыҙы. Улар шунда уҡ тыуған ауылдарындағы Әхмәтзәки Вәлиди музейын, Торатау шиханын, дөйәғоштәр фермаһын таныған. Киләсәктә тәрбиәсе уйынды яңы фотоһүрәттәр менән тулыландырырға ниәтләй. Башҡортостанда матур һәм ҡыҙыҡлы урындар бик күп бит!

Дуҫтар, «Үҙем эшләгән уйынсыҡ» конкурсына эштәр ҡабул итеү тамамланды. Кемдәр ҡатнашып өлгөрмәгән, кәйефегеҙҙе төшөрмәгеҙ. Алда тағы ла матур ижади бәйгеләр көтә! Беҙҙең менән ҡалығыҙ!