Дүртенселәр өсөн иҫтәлекле көн

Мәктәп тарихында тәүге тапҡыр «Йыл уҡыусыһы – 2024», «Йыл синыфы – 2024» билдәләнде. Кемдәр иң-иңеме? «Йыл уҡыу­сыһы – 2024» призына «Урал батыр» эпосын оҫта һөйләгән, «Башҡорт малайы» бәйгеһендә Гран-при яулаған, көрәштә бил бирмәгән һәм бейеүҙә оҫталыҡ күрһәткән IV «А» синыфы уҡыусыһы Нияз Баййегетов лайыҡ булды! Ә инде «Йыл синыфы – 2024» призы төрлө конкурс, олимпиадаларҙа ҡатнашып, гел алдынғы урын алған берҙәм һәм татыу IV «А» синыфы уҡыусыларына бирелде. Улар күсмә кубок менән бүләкләнде. Афарин! Был синыф менән үҙ эшен яратып баш­ҡарған уҡытыусы Динә Ғәфүр ҡыҙы Мырҙағәлина етәкселек итә.
Шул уҡ көндө IV «А»-лар, башланғыс синыфтарҙың сығарылыш уҡыусылары булараҡ, йола буйынса белем усағы янында алма, армыт (груша) ағастары ултыртты. Тиҙҙән улар ҙур булып үҫеп, дүртенселәрҙе хәтерләтеп, мәктәп янын биҙәп, шаулап ултырыр әле.

Зөһрә ХӘКИМОВА.