Беҙ - "Ватан ғорурлығы"

Форумда төрлө йүнәлеш буйынса секциялар эшләне. Беҙҙең лицейҙың VII «Б» синыфы уҡыусыһы Данис Аҡбулатов ҙур уңышҡа өлгәш­те – икенсе урын яуланы. Шул саҡта нисек шатланғанымды күрһәгеҙ! Мин бит уның етәк­сеһе булдым! Данис «Минең олатайым – һуғыш геройы» тигән сығыш әҙерләгәйне.
Уҡыусым легендар олата­һының хәрби һәм хеҙмәт юл­дарын, уның Беренсе Укра­ина фронтында танк пулемётсыһы булып һуғышыуын, Бөйөк Ватан һуғышы ваҡытында Житомирҙан алып Берлинға һәм Прагаға барып еткәнен яҙғайны. Ныҡ тырышты, күпме эҙләнеү эштәре алып барҙы.
Форумдың программаһы бай ине. Күпте белеп, күреп ҡайттыҡ. Залдарҙа төрлө темаға әңгәмәләр ҡоролдо. «Дрессировкала мотивация», «Бөйөк Еңеү полководецтары», «Ижадҡа һөйөү», «Балалар донъяһына һуҡмаҡ», «Сикһеҙ донъя» – һәр береһе ҡыҙыҡлы, фәһемле булды.
Форумда ҡатнаша алғаны­быҙ өсөн ҡалабыҙҙың мәғариф бүлеге начальнигы Рушан Нурмөхәмәт улы Дияровҡа, лицей директоры Оксана Михайловна Герасимоваға рәхмәт әйтәбеҙ.

Илһөйәр БАЙРАҠАЕВА,
тарих һәм йәмғиәтте өйрәнеү уҡытыусыһы.
Сибай ҡалаһы, «Ирәндек» лицейы.