Конкурсҡа халҡыбыҙҙың мәшһүр «Урал батыр» эпосы геройҙарының исемдәрен юҡҡа ғына ҡушманыҡ. Бөгөнгө башҡорт егеттәрен һәм ҡыҙҙарын ата-бабаларыбыҙ рухына тоғро итеп күргебеҙ килә. Уларҙың батыр ҙа, ҡыйыу ҙа, гүзәл дә, һылыу ҙа, изге күңелле лә булып үҫеүҙәрен теләйбеҙ. Илем, телем, ерем, һыуым, тип халыҡ өсөн янып йәшәһен ине йәш быуын.
Был үҙенсәлекле конкурста ҡатнашыр өсөн гәзитебеҙҙең «Бәйләнештә» социаль селтәрендәге төркөмөндә ошо иғлан аҫтына комментарий рәүешендә үҙегеҙ тәҡдим иткән шәп ҡыҙ йәки егеттең матур итеп төшкән сифатлы фотоһын беркетеп, бәйгесе хаҡында яҙырға кәрәк. Уны ата-әсәһе йә берәй туғаны, уҡытыусыһы, дуҫтары, әхирәттәре йә булмаһа башҡа берәйһе яҙып ебәреүе шарт. Автор ҙа, бәйгесе лә «Йәншишмә»нең «Бәйләнештә» социаль селтәрендәге төркөмөндә теркәлгән булырға тейеш. Ай һайын тауыш биреү ярҙамында еңеүсе булған бер егетте һәм бер ҡыҙҙы һайлап, гәзитебеҙ битендә баҫтырып барасаҡбыҙ.
Бәйге 1 февралдән башланып, йыл аҙағына тиклем дауам итәсәк. Тимәк, декабрь аҙаҡтарында беҙҙең еңеүсе 11 ҡыҙ һәм 11 егет билдәле буласаҡ. Улар араһында яңынан тауыш биреү ойоштороп, иң-иңдәрҙе асыҡлаясаҡбыҙ. Еңеүселәрҙе, әлбиттә, редакцияның иҫтәлекле бүләктәре һәм Маҡтау ҡағыҙҙары көтә.