Башҡорт теле буйынса республика олимпиадаһында призлы урын яулаусы егет бына нимә тип һөйләй: «Башҡорт теле, туған телем булараҡ, минең өсөн яҡын да, ҡәҙерле лә һәм ҡыҙыҡ та. Уҡытыусым Таңсулпан Әмир ҡыҙы Мусинаның тәҡдиме буйынса олимпиадала IX синыфтан ҡатнашып киләм һәм, ниһайәт, ҙур уңышҡа өлгәштем. Уҡытыусыма рәхмәтлемен. Шулай уҡ тарих, йәмғиәтте өйрәнеү һәм хоҡуҡ фәндәре буйынса район олимпиадаларында еңеүсе булдым. Һәр бәйгелә һынатмаҫҡа тырышам. Халҡыбыҙҙың, илебеҙҙен үткәнен, тарихын белеү, бәхәсле мәлдәрҙе асыҡлау, үҙебеҙҙең хоҡуҡтарыбыҙҙы, йәмғиәттең үҙенсәлектәрен өйрәнеү ҙә минең өсөн ҡыҙыҡлы. Китап уҡырға яратам, белемле, киң мәғлүмәтле булырға тырышам. Күңел төшөнкөлөгөнә бирелергә, туҡтап ҡалырға, сигенергә яратмайым. Минең девиз: „Тик алға һәм алға!“ Үҙемдең сәләмәтлегемде лә ҡайғыртам. Иң мөһиме — һаулыҡтың һәм ваҡыттың ҡәҙерен белергә кәрәк. „Һаулыҡты һатып алып булмай, ваҡытты кире ҡайтарып булмай“, — тип яҙа халыҡ яҙыусыһы Ғайса Хөсәйенов. Ошо алтын һүҙҙәр менән килешәм. Мин дә сәләмәтлек яҡлымын. Ҡышын саңғыла шыуһам, йәй йүгерергә әүәҫмен".
Афарин, Байрас! Бар теләктәрең, хыялың тормошҡа ашһын. Уңыштар теләйбеҙ!