Тауыш биреү бик ҡыҙыу барҙы. Бигерәк тә егеттәр араһында! Һуңғы минуттарға тиклем улар бер-береһенә ал бирмәҫкә тырышты. Афариндар! Урал батырҙай шәп егеттәр ана шулай сәмле лә, ныҡыш та, тырыш та булырға тейеш бит!
Ә еңеүселәр кемдәр, тиһегеҙме? Егеттәр араһында — 711 тауыш йыйып, Ихсан Әҡбәров, ә ҡыҙҙарҙан 430 тауыш менән Дилбәр Фәритова еңеп сыҡты! Улар бәйгенең икенсе этабында ҡатнашыу хоҡуғы ала.
Егеттәр араһында 21 тауышҡа ғына ҡалышып, Ауырғазы районы Төрөмбәт мәктәбенең VII синыф уҡыусыһы Арыҫлан Исхаҡов — II, Баймаҡ районы Темәс мәктәбенең IX синыф уҡыусыһы Байрас Яҫыбаев III урын яуланы.
Ҡыҙҙар араһында Ғафури районы Нияз Мәжитов исемендәге Красноусол башҡорт интернат- гимназияһының I «А» синыфы уҡыусыһы Гөлфинә Ғәзизова — II, Белорет ҡалаһындағы Яныбай Хамматов исемендәге башҡорт гимназияһының VI синыф уҡыусыһы Камила Сәфәрғәлина III урынға лайыҡ булды. Ҡотлайбыҙ!
Барлыҡ ҡатнашыусыларға ла «Йәншишмә» гәзитенең Почёт грамотаһы ебәреләсәк.