25 килограмлыҡ ҡабаҡ!

108-се мәктәптә уңыш байрамы йыл һайын үтә. Әлегеһендә йыйылған аҡсаның бер өлөшөн уҡыусылар хеҙмәт кабинетын төҙөкләндереүгә ҡушты: яңыраҡ грант отҡайнылар, бүлмәне тағы ла матурыраҡ, уңайлыраҡ күргеләре килә, үҙҙәре шунда юна-йыша, бешеренәсәк бит. Хәҙер инде был кабинетта бөтә шарттар буласаҡ!
Һәр синыфтың өҫтәле нимә менән бул­һа ла тартып тора ине. Бына VIII «Б»-лар: мөйөштәрен милли стилдә биҙәгән. Баш­ҡорт аш-һыуы ҡу­йыл­ған, балаҫтар йәйелгән, ә үҙҙәре ниндәй ҡупшылар! Ҡыҙҙар – милли күлдәктәрҙә, малайҙар камзулда килгән. Башҡа өҫтәлдәр­ҙә иһә татар, урыҫ, үзбәк, грузин ризығы күренә ине. Уларҙың төрлөлөгөнән күҙҙәр ҡамаша, һәр береһен тәмләге килә.
– Бөгөн бигерәк күңелле. Уҡыусылар концерт номерҙары ла әҙерләне. Иғтибар итегеҙ – бында үҙебеҙҙең уҡыусылар, ата-әсәләр генә түгел, күрше йорттарҙан да халыҡ ағыла, ҡыҙыҡһынып килеп еткәндәр, – ти директорҙың тәрбиәүи эштәр буйынса урынбаҫары Айнур Шайморат улы Сәхәүетдинов.
35 өҫтәл араһынан иң матуры ҡайһыһы икәнен билдәләү мөмкин дә түгел ине. Шуға ла һәр синыф ниндәйҙер номинацияға лайыҡ булды: «Алтын кәрзин», «Халыҡ йөрәге», «Иң тәмле өҫтәл», «Көҙгө аҡлан», «Илһам», «Кескәй баҡса»...
Байрамдан барыһы ла шәп кәйефтә таралышты.