+21 °С
Болотло
Йәйге ял
26 Июнь 2021, 07:47
Өфөнө күреп ҡайттыҡ
Бала саҡта кем генә баш ҡалаға сәйәхәт ҡылырға хыялланмай икән?!
Ә бына беҙҙең был теләгебеҙ тормошҡа ашты. Күптән түгел, ҡояшлы май айында, беҙгә, бер төркөм уҡыусыларға, «Аҡыллы ялдар» сәйәхәте ойошторолдо. Районыбыҙҙың мәғариф бүлеге начальнигы урынбаҫары Гөлдәр Әхмәҙулла ҡыҙы Рәхимова, уҡытыусыларыбыҙ Альбина Ринат ҡыҙы Мулләхмәтова һәм Йондоҙ Рәмил ҡыҙы Хисаметдинова оҙатыуында беҙ Өфөгә юлландыҡ.
Телевизор аша ғына күргән «Башҡортостан» дәүләт телерадиокомпанияһының «Тамыр» балалар студияһында беҙҙе йылы ҡаршы алдылар. Шуныһы ҡыуандырҙы: билдәле тележурналист, «Тамыр» балалар телеканалы директоры, Шәйехзада Бабич исемендәге дәүләт йәштәр премияһы лауреаты Гөлназ Фәрит ҡыҙы Ҡолһарина экскурсияны ла хәстәрләп ҡуйған ине. Студия һәм БЮТ каналы буйынса сәйәхәт ойоштороусы Ләйсән Мәзитова ла «Ҡош юлы» тапшырыуы нисек төшөрөлөүе тураһында ҡыҙыҡлы итеп һөйләп бирҙе.Беҙҙе бында сюрприз да көткән. Легендар шәхес булған Рәсәй шашкасыһы, халыҡ-ара шашка буйынса ете тапҡыр донъя чемпионы Тамара Танһыҡҡужинаны осраттыҡ!
Салауат Юлаев исемендәге майҙанда Башҡортостан Республикаһының «АРТ-Ҡоролтай» мәҙәни форумы барышында «CIOFF® VI Бөтә донъя фольклориадаһына тиклем 50 көн» кире иҫәпте асыу тантанаһы бара ине. Башҡорт халҡының арҙаҡлы улдары, беҙҙең киләсәгебеҙ өсөн тәнен-йәнен аямаған, азатлыҡ өсөн көрәшкән Салауат Юлаев һәм Шәйехзада Бабичтар менән осрашҡандай булдыҡ. Уларҙың һәйкәлдәре эргәһендә иҫтәлеккә фотоға ла төштөк.
Был көндө Башҡортостандың партия һәм дәүләт эшмәкәре, журналист һәм яҙыусы, Беренсе донъя һәм граждандар һуғыштарында ҡатнашыусы Шәһит Хоҙайбирҙин исемендәге йорт-музейҙа легендар шәхес тураһында бик күп мәғлүмәттәр белдек. Шулай уҡ Башҡортостан Республикаһының 50-нән артыҡ тыуған яҡты өйрәнеү музейҙарын берләштергән Башҡортостан Республикаһының Милли музейында тарихҡа бай экспонаттар менән таныштыҡ. Артабан сәйәхәтебеҙ барышында Башҡорттарҙың Рәсәйгә ҡушылыуына 400 йыл тулыу айҡанлы 1965 йылда Ағиҙел ярында ҡуйылған һәйкәл – Дуҫлыҡ монументы янында ла туҡталдыҡ.
Бына ошолай беҙгә бер көнлөк «Аҡыллы ялдар» ойошторолдо. Онотолмаҫ тәьҫораттар алып, бай мәғлүмәттәр, рухи байлыҡ тейәп ҡайттыҡ Әбйәлилгә.
Был бәхет кемдәргә эләкте, тиһегеҙме? Олимпиадаларҙа, конкурстарҙа, фәнни-ғәмәли конференцияларҙа әүҙем ҡатнашыусыларға, туған телебеҙ – башҡорт телен сикһеҙ яратыусыларға һәм һәләтлеләргә. Беҙҙе илһамландырыусы Гөлдәр Әхмәҙулла ҡыҙына, Альбина Ринат ҡыҙына, Йондоҙ Рәмил ҡыҙына, фатихаһын биргән мәғариф бүлеге начальнигы Батыр Харис улына, водителебеҙ Фәнис ағайға сикһеҙ рәхмәтлебеҙ.
Светлана КИЛМӨХӘМӘТОВА, йәш хәбәрсе.
Әбйәлил районы, Асҡарҙағы Таһир Күсимов исемендәге гимназия.
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
