Талбазылар – "Йәйләү"ҙә

– Ялыбыҙ ҡыҙыҡлы үтә. Бөгөнгө көнөбөҙ ныҡ иҫтәлек­ле булды. Ул Рәсәй Геройы, легендар яҡташыбыҙ, генерал-майор Миңлеғәле Минһажетдин улы Шайморатов­ҡа арнал­ғайны. Балалар «Йәйләү» гимнын баш­ҡарғандан һуң данлыҡлы генерал тураһында бай мәғлүмәт алды. Улар «Шайморатов генерал» йырын баш­ҡорт һәм урыҫ телен­дә башҡар­ҙы. Утта янмай, һыуҙа батмай тор­ған ба­тырыбыҙҙың тыу­ған ауылы, һәйкәлдәре тураһында әңгәмә ҡор­ҙоҡ. Уҡыу­сыларға ныҡ оҡшаны.
Шулай уҡ бөйөк урыҫ императоры Пётр Беренсенең тыуыуына 350 йыл тулыуын да билдәләнек. Балалар уның тормош юлы тураһында презентация ҡарап, бик күпте белеп ҡалды.
Ырыуҙар араһында ойошто­ролған «Тыуған яғыңды белә­һеңме?» тигән викторина ла ҡыҙыҡлы булды. Балалар кем уҙар­ҙан һорауҙар­ға яуап биреп, унда ихлас ҡатнашты. Ярышып мәрәй йый­ҙылар, – ти көндөҙгө лагерҙың тәрбиәсеһе Розалиә Әхмәт ҡыҙы Йәлилова.
Был көндө уҡыусылар күңелле уйындар уйнап, төрлө хайуандар­ҙы, ҡоштарҙы һүрәткә төшөрөү, пластилиндан һындарын әүәләү конкурстарында ҡатнашып та өлгөргән. Иң-иңдәр бүләктәр алып ҡыуанған.
Ашнаҡсы апайҙары күңел йылыһын һалып бешергән тәмле ризыҡты ашағандан һуң рәхмәт әйтеп, өйҙәренә шатланышып таралыш­ҡандар.

З. ИҪӘНДӘҮЛӘТОВА.