Ауылда күңелле!

Динар Рәхимғолов – Өфөләге 118-се мәктәптең IV синыфын тамамлаған. Алмаз менән Рәмис Рәхимғоловтар Өфө районының Нуғай ауылынан, 147-се мәктәптә уҡыйҙар. Рәмис – IV, Алмаз II синыфты бөткән. Ислам Насиров иһә Әлшәй районының Раевка ауылынан ҡунаҡҡа килгән. Ул – гимназияның III синыф уҡыу­сыһы.
Ике туған малайҙар бер-береһе өсөн өҙөлөп тора, һағынып осрашалар, һөйләшеп һүҙҙәре бөтмәй. Күмәкләшеп шау-гөр килеп футбол уйнайҙар, велосипедта елдерәләр, Биштирәк күлендә һыу инәләр, ҡояшта ҡыҙыналар.
Бер-бер артлы үҫеп килгән ейәндәренә ҡарап, өләсәйҙәре лә ҡыуанып бөтә алмай, үҙҙәрен тәмле ризыҡтар менән һыйлай, арҡаларынан тупылдатып һөйөп туймай.
– Ауылға ҡайтыу менән тыштан индереп алып булмай үҙҙәрен. Балалар телефондан айырылмай тор­ған хәҙерге заманда саф һауала йөрөүҙәре сихәт ул, тип ҡыуанам ғына. Уландарым ҡайтҡас, миңә лә эш кәмене. Баҡсаға һыу һибәләләр, ҡый үләндәрен утай­ҙар, ҡош-ҡорт ҡарашалар, көтөү ҡаршылайҙар. Аллаға шөкөр, ярҙамсыларымдан уңдым, – ти йылмайып өләсәйҙәре Гөлшат Әғләм ҡыҙы Рәхимғолова.
Атай-әсәйҙәре менән бергә еләк йыйырға ла бар­ған, көтөү көтөргә лә өл­гөргән был эшһөйәр малай­ҙар.
– Күмәк булғас, көтөү көтөүе, эй, күңелле булды. Өләсәйем беҙҙе тәмлекәстәр менән һыйланы. Мал артынан йүгереп арыттырһа ла, ныҡ оҡшаны, – ти Динар.
Ауыл тормошон һағынып ҡайтҡан малайҙарҙың ялдарынан ҡәнәғәт булыуҙары күренеп тора, йөҙҙәре ҡояштай балҡый.
– Һыйырҙар үлән утлаған арала Аҡкүлдә балыҡ та ҡармаҡланыҡ. Иң күбе Рәмис ағайыма эләкте, – тип һүҙгә ҡушылды араларында иң бәләкәйе булған Алмаз.
Нарыҫтау ауылы бик матур ерҙә урынлашҡан. Малайҙар был хаҡта ла кинәнеп һөйләне.
– Ауыл эргәһенән һуҙылып киткән тауҙар ныҡ оҡшай миңә. Яңыраҡ күмәкләшеп унда ла мендек. Тау башынан ауыл ус төбөндәй генә булып күренә. Тирә-яғындағы күлдәргә лә һәр саҡ ҡарап һоҡланабыҙ, – ти Ислам.
Был малайҙарҙың каникулы ауылда, өләсәй янында, ана, шулай күңелле үтә. Сынығып һәм көс йыйып, ҙурайышып, мәктәпкә барырҙар әле. Ә әлегә рәхәтләнеп ял итһендәр.

Ю. ӘХМӘТЙӘНОВА.