+24 °С
Ямғыр
Йәйге ял
22 Июль 2023, 10:00
Уңған да икән үҙе!
Эше лә, ялы ла бергә, ти Иҫке Собханғол мәктәбенең VII «А» синыфы уҡыусыһы Вилдан Фәйзуллин. Бигерәк уңған, тырыш бала инде үҙе. Әле дуҫтары менән бер-береһенә ярҙам итеп, атай-әсәйҙәрен ҡыуандыралар. Башта баҡса эше менән булышалар. Йәй башында уҡ ҡый үләне утап, картуф күмгәндәр. Бергәләп техника ла ремонтлағандар, мал-тыуар кәртәһен таҙалағандар, утын ярып, өйөп ҡуйғандар.
– Бер-беребеҙгә шулай ярҙам итһәк, тиҙерәк тә, күңелле лә, эшебеҙ ырамлы була,– ти Вилдан. – Буш ваҡыт күберәк ҡала. Эш араһында иҫке тимер-томор йыйып та тапшырабыҙ. Спорт майҙанында волейбол, футбол уйнап та алабыҙ. Әле көндәр эҫе торғас, Ағиҙелдә рәхәтләнеп һыу инәбеҙ.
Был өлгөр егет бер ҙә телефон тотоп, өйҙә ултырмай икән, күберәк файҙалы эш менән мәшғүл. Баҡсаларындағы емештәрҙе йыйып алған, ҡырға еләккә лә йөрөгән. Уны ағаһы Линар менән таҙалап та ҡуйған әле. Әсәйҙәрен ныҡ ҡыуандырғандар. Тағы ла Байғаҙы ауылында йәшәгән өләсәһенә барып, ҡулынан килгәнсе уға ла ярҙам итеп ҡайтҡан.
Әле бесән сабыу мәле башланырға тора. Вилдан был эшкә лә күптән әҙер. Былтырғы һымаҡ бабайҙарына бәләкәй тракторҙа бесән сабырға йыйына. Һай, уңған егет, үҙен маҡтағандан-маҡтағы килә!
Зөһрә ХӘКИМОВА.
Бөрйән районы.
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
