+12 °С
Болотло
TelegramVKOK
Бөтә яңылыҡтар
Йәйге ял
3 Август 2023, 17:24

«Йәйләү»ҙәге йәмле көндәр

Беҙҙең мәктәп лагерында 60 бала ял итте. Улар 21 көн буйы төрлө сарала ҡатнашып, рәхәтләнеп уйнап-көлөп, һаулығын нығытты. Балаларҙы беҙ өс отрядҡа бүлдек, шулар­ҙың береһен «Йәйләү» тип атаныҡ.

«Йәйләү»ҙәге йәмле көндәр
«Йәйләү»ҙәге йәмле көндәр

Лагерҙа һәр көн ҡыҙыҡлы уҙҙы. «Йәйләү»гә йыйылғандар беренсе көндән үк Үҫәргән ырыуының тарихын өйрәнә башланы. Улар үҙҙәренә девиз, йыр һайланы. Ырыу­ҙың оранын, тамғаһын, ҡошон, ағасын өйрәнделәр.
«Йәйләү»ҙә балаларҙың һәләттәрен төрлө яҡлап асырға тырыштыҡ. Улар башҡортса ғы­на аралашырға тейеш ине. Ял итеүселәр ҙур ҡыҙыҡһыныу менән халҡыбыҙҙың тарихын, мәҙәниәтен, йолаларын, балалар уйындарын, милли спорт төрҙәрен өйрәнде. Малайҙар, ҡыҙҙарҙы боронғо шифалы ризыҡтар әҙерләү серҙәре, ырыу легендалары, күренекле шәхестәребеҙ, сәнғәт әһелдәре менән таныштырҙыҡ. Аҡъяр­ҙағы һәм Татырүҙәктәге тыуған яҡты өйрәнеү музейҙарына барыу ҙа фәһемле булды.
Лагерҙа Уҡытыусы һәм ос­таз йылына арналған кисәләр, лекциялар, презентациялар ойошторолдо. Аҡъяр телевидениеһы хеҙмәткәрҙәре, ҡул оҫтаһы Азамат Мәмбәтов, Рима Солтанова, «Ағинәйҙәр» ойош­маһы ағзалары, мәктәбебеҙҙең ветерандары менән осрашыуҙар ҙа үтте. Бергәләп фильмдар ҡараныҡ.
Ялдың һуңғы көнөндә ҡыҙҙар һәм малайҙарҙы һабантуй көтә ине. Төрлө ярыштар, милли уйындар, кү­ңелле йырҙар, дәртле бейеүҙәр – лагерь шат тауыштарҙан яң­ғырап торҙо.
– Балаларға матур ял бүләк иттегеҙ. Минең улым беренсе синыфты тамамланы. Ул көн дә лагерға теләп йөрөнө, барырға ашҡынып ҡына торҙо, – тип мәктәп етәкселеген маҡтаны ауылдашыбыҙ Гөлсинә Баястанова. Башҡа ата-әсәләр ҙә ҡәнәғәт булыуҙарын белдер­ҙе, рәхмәттәрен әйтте.
Ысынлап та, балаларға «Йәйләү»ҙә ныҡ оҡшаны.

Рәйфә ТҮЛЕБАЕВА, башҡорт теле һәм әҙәбиәте уҡытыусыһы.
Хәйбулла районы, Татырүҙәк мәктәбе.

«Йәйләү»ҙәге йәмле көндәр
«Йәйләү»ҙәге йәмле көндәр
Автор:"Йәншишмә" гәзите
Читайте нас: