Яңы йылдың беренсе көнө, тип көн менән төндөң тигеҙләшкән ваҡытын (ул 21 мартҡа тура килә) иҫәпләгәндәр. Беҙҙең халыҡта уны "Нәүрүз", тип атағандар. Был гүзәл байрам көнөндә кешеләр бер-береһенә ҡунаҡҡа йөрөйҙәр, йырлайҙар, бейейҙәр, рәхәтләнеп күңел асалар. Иң сибәр, иң уңған ҡыҙҙы Нәүрүзбикә итеп һайлап ҡуялар. Ул ҡыш бабай менән ярыша һәм еңеп сыға. Ана шул Ҡыш бабай ҡиәфәтендәге иҫке йыл ҡыуып ебәрелә. Был көндө самауыр куйыла, тәмле ҡоймаҡтар бешерелә, һыйҙан бар ҡунаҡтар ҙа ауыҙ итә.