Ауыл ерендә күп ғаиләләр оя-оя ҡаҙ үҫтерә. Яҙ сыҡҡан бәпкәләр көҙгә ҙур булып үҫәләр. Шул ваҡытта хужа йәш килендәрҙе, ҡыҙҙарҙы, күршеләрен өмәгә саҡыра. Байрамса кейенгән йәштәр, шаян һүҙҙәр һөйләй-һөйләй, күңелле йырҙар көйләй-көйләй, ҡаҙ йолҡа. Ҡыҙҙар үҙҙәренең оҫталыҡтарын күрһәтергә тырыша. Ҡаҙ өмәһендә кешеләр бер-береһе менән яҡынданыраҡ аралаша, күңел аса.
Шунан инде ҡаҙҙарҙы көйәнтәләргә элеп, йылғаға йәки күлгә барып йыуалар. Бында ла йыр-моң яңғырап тора.
«Ҡаҙ өмәһе»н Фәйзулла Солтанов исемендәге Иҫәнғол мәктәбенең IV «Б» синыфы уҡыусылары ла үткәрҙе. Улар күңелле йырҙар йырлап, уйындар уйнап, бейеүҙәр бейеп, йылға буйына барып, ҡаҙҙарҙы йыуып – урыны-шартына килтереп ойошторҙо был байрамды. Атай-әсәйҙәр, өләсәйҙәр балаларҙың сығыштарын ҡыуанып-шатланып ҡарап ултырҙы. Дүртенселәр ныҡлы әҙерләнгәйне. Һоҡландырҙылар, үҙҙәрен маҡтаған һайын маҡтағы килә.
Матур байрам күрһәтте дүртенселәр. Үҙебеҙҙе ысын ҡаҙ өмәһендә ҡатнашҡан кеүек хис иттек. Йолаларыбыҙҙы онотмайыҡ, уларҙы балаларыбыҙ белеп үҫһен.
Ләйсән АҘНАБАЕВА,
башланғыс синыфтар уҡытыусыһы.
Ейәнсура районы, Иҫәнғол ауылы.