Көҙ еткәс, ҡыҙҙар ҡаҙ өмәһенә йөрөй башлаған. Йолҡолған ҡаҙҙарҙы көйәнтәгә аҫып шишмәгә, мәкегә алып төшкәндәр. Шул һыуҙа ҡаҙҙарҙы йыуғандар. Ғәҙәттә, ҡурайҙары менән бергә егеттәр ҙә шишмәгә төшкән. Ҡаҙҙарҙы йыуып ҡайтыуға хужабикә ҡаҙ майында ҡоймаҡ, тәбикмәк бешереп, сәй әҙерләп көтөп торған. Киске мәжлес тамамланғас, йортта йәштәр уйыны ойошторолған.
Әлеге көндә ҡаҙ өмәләре башлыса йорт хужалары һәм күрше-тирә, туғандар ҡатнашлығында уҙа. Бөгөн Аҡъяр ауылында йәшәүсе Мәрйәм Ишкилдинаның йортонда ҡаҙ өмәһе гөрләй. Туғыҙынсы тиҫтәне ҡыуып килгән Мәрйәм инәй ҡаҙҙы элек-электән аҫрай.
– Быйылғы ямғырлы, үләнле йылда ҡаҙҙар айырыуса тос булған, – ти өмәселәр.
Сығанаҡ һәм фото: vk.com